Turizmdi rawajlandırıw hám az úyrenilgen aymaqlarǵa itibar qaratıw maqsetinde Nepal keyingi eki jıl dawamında Gimalay tawınıń 97 shıńın biypul iyelewge ruqsat berdi.

Bul qarar dúnyadaǵı eń biyik shıń – Everestke shıǵıw ushın ruqsatnamanıń bahası sońǵı toǵız jılda birinshi márte kóterilip, sentyabrden baslap 15 000 dollarǵa kóteriliwi fonında qabıl etildi.
Mámlekettiń Turizm basqarması bul baslama Karnali hám Sudurpaschim wálayatlarındaǵı tábiyǵıy gózzallıqtı úgit-násiyatlawǵa járdem beriwine úmit etpekte. Mámlekettiń eń kámbaǵal, rawajlanbaǵan aymaqları esaplanatuǵın bul wálayatlardan tańlap alınǵan shıńlar 5 970 hám 7 132 metr biyiklik aralıǵında jaylasqan.
– Teńsiz sulıwlıǵına qaramastan, kiriw qıyınlıǵı sebepli bul aymaqlarǵa turistler, alpinistler júdá az keledi, – deydi Turizm basqarmasınıń direktorı Himol Gautam. – Ornatılatuǵın tártip jańa jumıs orınların jaratıp, qosımsha dáramat alıp kelip, jergilikli ekonomikanı bekkemlewge xızmet etedi.
Házirshe húkimet usı shetki aymaqlarda infrastruktura hám transport imkaniyatın jaqsılaw boyınsha anıq reje usınıs etpegen. Sońǵı eki jılda bar shıńlardıń 68 ine alpinist shıqqan. Maǵlıwmat ornında aytıw kerek, 2024-jılı Everestke shıǵıw ushın 421 ruqsatnama berilgen.
Simvolikalıq mánide “Dúnya tóbesi” dep atalatuǵın, teńiz qáddinen 8 849 metr biyiklikte jaylasqan bul mánzilde sońǵı jılları hádden tısqarı tıǵılıs baqlanbaqta. Sonıń menen birge, ekologiya mashqalası hám shıǵıwǵa urınıw waqtında apatshılıq júz beriwi menen baylanıslı hár qıylı qáweterler de kóbeygen. Ótken aprel ayında Nepal Joqarı sudı húkimetke Everest hám basqa da iri shıńlar ushın ruqsatnama sanın sheklew boyınsha kórsetpe bergen.
Jańa nızam joybarına bola, Everestti iyelewdi qálewshiler aldın Nepal aymaǵındaǵı 7 000 metrden biyik shıńǵa shıqqan bolıwı shárt boladı. Sol sebepli Karnali hám Sudurpaschimdegi biypul shıńlar alpinistler ushın ideal tayarlıq mánzili sıpatında kórilip atır.

Muslim Ziyo, ÓzA