“Ózbekstan – 2030” strategiyasın “Qorshaǵan ortalıqtı qorǵaw hám “jasıl” ekonomika jılı”nda ámelge asırıwǵa baylanıslı Mámleketlik baǵdarlamanıń 2025-jıldıń birinshi yarım jıllıǵında 277 bánttegi wazıypalardı ámelge asırıw belgilengen. Ótken altı ay dawamında usı wazıypalardan 224 iniń orınlanıwı támiyinlengen. Qalǵanlarınıń bolsa múddeti sozdırılǵan yamasa orınlanıw aldında. Jalpı ishki ónim kólemi 7,2 procentke, mámleketlik byudjet qarjıları bolsa 27 procentten artqan.

Bul haqqında Oliy Majlis Nızamshılıq palatasındaǵı Ózbekstan “Milliy tiklanish” demokratiyalıq partiyasınıń májilisinde aytıp ótildi. Onda deputatlar Mámleketlik baǵdarlamanıń 2025-jıldıń birinshi yarım jıllıǵındaǵı orınlanıwın partiya ideyalarınan kelip shıqqan halda dodaladı.
Atap aytqanda, deputatlar tiykarǵı itibardı tálim-tárbiya, balalardı milliy ruwxta tárbiyalaw, kitapqumarlıqqa úyretiw baǵdarındaǵı háreketlerge qarattı.
Esabatta atap ótilgenindey, ótken dáwirde 35 jańa mámleketlik mektepke shekemgi bilimlendiriw shólkemi shólkemlestirildi hám qamtıp alıw 77 procentke, 6 jasar balalardı mektepke tayarlawǵa qamtıp alıw bolsa 96 procentke jetti.
Frakciya aǵzaları mekteplerdi aǵımdaǵı ońlaw hám sabaqlıqlar hám kórkem ádebiyatlar menen támiyinlew, sonday-aq, balalar ushın milliy kontentler jaratıw, baqshalardı ádebiyatlar menen támiyinlew sıyaqlı máselelerdi ortaǵa qoydı.
Sonıń ishinde, deputat Umida Rahmonova aymaqlardaǵı úyreniwlerde ayırım mekteplerdi ońlaw jumısların oktyabr-noyabrde juwmaqlaw belgilengenine gúwa bolǵanın atap ótip, sabaqlar sentyabrde baslansa, waqtında juwmaqlanbaǵan ońlaw jumısları bilimlendiriw sapasına tásir etpey me, degen sorawdı kóterdi. Sonday-aq, mekteplerdi sabaqlıqlar menen támiyinlew qay dárejede sheshilgeni menen qızıqtı.
Buǵan juwap retinde Mektepke shekemgi hám mektep bilimlendiriwi ministrliginiń juwapkeri ońlanıwı oktyabr-noyabrge shekem názerde tutılǵan mekteplerdiń oqıwshıları jaqın átiraptaǵı mekteplerge tartılatuǵının málim etti. Sabaqlıqlar menen támiyinlew máselesi de turaqlı itibarda ekenin, jańa sabaqlıqlar menen qamtıp alıw dárejesi 70 procentten artqanın aytıp ótti.
Sonday-aq, dodalawlarda “Jas kitapqumar” tańlawında oqıw ushın usınıs etilgen kitaplar dizimindegi barlıq kitaplar mektep kitapxanalarında bar ma, degen soraw kóterildi. Oǵan juwap retinde mekteplerge kórkem shıǵarmalar jetkerip berilip atırǵanı, sonıń menen birge, Jaslar isleri agentligi tárepinen jolǵa qoyılǵan “Oqıw” kontentinde dizimdegi barlıq kitaplardıń elektron hám audio variantları jaylastırılǵanı atap ótildi.

Muhtarama Komilova, Doniyor Yoqubov, Anvar Ahmedov (video), ÓzA