Ózbekstan Respublikası mámleketlik ǵárezsizliginiń 34 jıllıǵı múnásibeti menen elimiz boylap ótkerilip atırǵan bayramǵa baǵıshlanǵan ilajlar kóterińkilik ruwxta dawam etpekte. Jaqında ǵana kásiplik bayramın belgilegen qurılısshılarımız da bayramǵa múnásip sawǵaların tayarlaǵan.

Nókis qalasındaǵı Jańabazar MPJ aymaǵında da jańadan boy tiklegen 12-sanlı shańaraqlıq poliklinikası paydalanıwǵa tapsırıldı.
Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, Densawlıqtı saqlaw ministri M.Qurbanov, Nókis qalasınıń hákimi A.Daniyarov, sonday-aq, medicina xızmetkerleri hám aymaq turǵınları qatnastı.
Ilajda atap ótilgenindey, sońǵı jıllarda elimizde densawlıqtı saqlaw tarawın túp-tiykarınan jetilistiriw, medicinalıq xızmet kórsetiwdiń sapasın hám nátiyjeliligin arttırıw, jámiyette salamat turmıs tárizin qáliplestiriw, medicina tarawın zaman talapları dárejesine alıp shıǵıw baǵdarında keń kólemli reformalar ámelge asırılmaqta.
Jańa imarattı qurıw ushın Prezidentimizdiń tapsırması menen 7,2 mlrd. sum qarjı ajıratılǵanın atap ótiw orınlı. Usı tiykarda zamanagóy, barlıq qolaylıqlarǵa iye jańa sociallıq obekt boy tikledi.
– Burın aymaǵımızda jasap atırǵan puqaralar 2-sanlı shańaraqlıq poliklinikaǵa barıp kórinetuǵın edi. Endi úyimizdiń qasında jaylasqan poliklinikaǵa kórinetuǵın bolǵanımızdan quwanıp atırmız. Aymaq turǵınları jańadan salınǵan poliklinikanıń ishin kórip, jaratılǵan sharayatlar menen tanısıp quwanıp atır. Jaratılǵan múmkinshiliklerdiń barlıǵı kewildegidey. Ilayım elimiz tınısh, xalqımız aman bolǵay. Aymaq turǵınlarınıń múshkilin jeńilletip bergeni ushın Prezidentimizge úlken alǵıslarımızdı aytamız, basshılarımızǵa minnetdarshılıq bildiremiz.,-deydi aymaq turǵınları.
Álbette, paydalanıwǵa tapsırılǵan bul poliklinika aymaqta jasawshı puqaralarǵa medicinalıq xızmet kórsetiwdiń sapasın jáne de jaqsılawǵa xızmet etedi.

Qaraqalpaqstan xabar agentligi