Qaraqalpaqstan Respublikası Shımbay rayonınan kásip-óner úyreniw, isbilermenlik jumısın jolǵa qoyıw tilegindegi bir topar jaslar zárúr bilim hám kónlikpelerge iye bolıw maqsetinde Ándijanǵa keldi. Olar temir jol vokzalında saltanatlı túrde kútip alındı.

Miymanlar “Ándijan mebel klasteri”, “Altınkól gúl ósiriw orayı”, “Digital Hub” logistika orayı, Ándijan qalasındaǵı Zergerlik klasteriniń jumısı, Altınkól rayonındaǵı Ijtimoiyat máhállesinde mebel islep shıǵarıw baǵdarında alıp barılıp atırǵan jumıslar, ulıwma, wálayattaǵı dóretiwshilik, jas isbilermenler tárepinen ámelge asırılıp atırǵan ibratlı jumıslar menen jaqınnan tanıstı.
– “Bir máhálle – bir ónim” principi tiykarında Altınkól rayonı Ijtimoiyat máhállesinde konveyer usılında mebel ónimlerin tayarlaw jumısları júdá jaqsı jolǵa qoyılǵan eken, – deydi shımbaylı Alisher Bektursunov. – Máhállede derlik 400 shańaraq áne usı jumıs penen shuǵıllanadı eken. Biri stol-stul hám basqa mebel úskeneleriniń hár túrli bóleklerin tayarlap beredi, biri jıynaydı, jáne birewi onı qayta isleydi. Usı tárizde mebel ónimleri tayarlanıp, qarıydarlarǵa jetkerip beriledi eken. Mine, usı processlerdi baqladıq, bul bizde úlken tásir hám qızıǵıwshılıq oyattı. Usı máhálleniń tájiriybesi tiykarında ózim jasaytuǵın máhállede mebel islep shıǵarıwdı jolǵa qoyıwdı niyet ettim. Nesip etse, usı isti ámelge asırıwǵa shın kewilden háreket etemen.

Sapar dawamında shımbaylı jaslar túrli baǵdarlarda jumıs alıp barıp atırǵan isbilermenler menen ushırastı, jumıs processlerin tikkeley baqladı, olar menen sóylesiwler ótkerdi.
Isbilermenlerdiń jumısı menen tanısıw, olar menen sáwbetlesiw shımbaylı jaslarǵa ózleri qızıqtırǵan ónerlerdi iyelew, joqarı dáramatlı isbilermenlik ideyaların ámelge asırıw ushın úlken xoshamet berdi.

Jaslar isleri agentligi, Sawda-sanaat palatasınıń wálayatlıq basqarması, “Jaslar – keleshegimiz” qorı tárepinen qaraqalpaqstanlı jaslar ushın Ándijannıń dıqqatqa ılayıq orınlarına sayaxatlar shólkemlestirildi.

Faxriddin UBAYDULLAEV,
ÓzAnıń xabarshısı