Qurılıs tarawı xızmetkerleri kúni múnásibeti menen Beruniy rayonında ilaj ótkerildi. Onda rayon hákimi I.Xidirov taraw wákillerin qızǵın qutlıqlap, olardıń miynetine joqarı baha berdi,-dep maǵlıwmat beredi rayon hákimligi Málimleme xızmeti bólimi.

Bizge belgili, hár bir imarat, jol, kópir yamasa sociallıq obekt artında qurılısshı, injener, joybarlawshı hám basqa da taraw qánigeleriniń pidákerlik miyneti jámlengen. Olar tárepinen elimizde hár jılı júzlegen jańa obektler qurılıp, xalıq ushın qolaylı hám zamanagóy sharayatlar jaratılmaqta.
Búgingi kúnde elimizde qurılıs sanaatınıń rawajlanıwına ayrıqsha itibar qaratılıp atırǵanı taraw qánigelerine bolǵan itibar hám isenimniń ayqın kórinisi bolıp esaplanadı. Beruniy rayonında usı taraw iyeleriniń kásiplik bayramı múnásibeti menen bir topar qurılısshılar sıylıqlandı hám aldaǵı jumıslarında áwmet yar bolsın, dep jaqsı tilekler bildirildi.
Bunday ilajlar arqalı tek ǵana qánigelerdiń miyneti tán alınıp qoymastan, al jas áwladtı qábiletli hám juwapkershilikli qánige iyesi bolıwǵa shaqıradı. Qurılıs tarawı iyeleri mámlekettiń rawajlanıwına xızmet etetuǵın eń zárúr hám maqtanıshlı kásip iyeleri sıpatında tán alındı.

Qaraqalpaqstan xabar agentligi