Prezidentimizdiń tapsırması menen qabıl etilgen Ministrler Kabinetiniń 2023-jıl 2-fevraldaǵı «Qaraqalpaqstan Respublikasında xalıq ushın múnásip turmıs sharayatların jaratıw hám máhálleler infrastrukturasın jáne de jetilistiriw ilajları haqqında» ǵı qararı tiykarında respublikamızda keń kólemli jumıslar alıp barılmaqta.

Usı qarar tiykarında Nókis rayonında járdemge mútáj puqaralardıń turaq jaylarınıń tóbesin shiferlaw, jasaw ushın jaramsızların jańadan qurıw jumısları ámelge asırılmaqta. Rayonǵa bekitilgen Samarqand wálayatı hákimligi tárepinen rayon xalqınıń jasaw sharayatın jaqsılaw hám kem támiyinlengen shańaraqlarǵa járdem beriw arqalı olarǵa qolaylıqlar jaratıw boyınsha alıp barılǵan jumıslar sheńberinde bir qatar unamlı nátiyjeler kózge taslanbaqta.
-Kem támiyinlengen shańaraq bolǵanlıqtan jasap atırǵan jayımızdıń tóbesin shiferlay almay atır edik. Jawın-shashınnıń waqtında ishke ótip kóp qıynalatuǵın edik. Kóp waqıttan berli qıynap kiyatırǵan usı mashqalamız unamlı sheshilip, rayon hákimligi hám Samarqand wálayatı hákimliginiń qáwenderligi menen jayımızdıń tóbesi shiferlanıp berildi. Bul ushın biz shańaraǵımız atınan Prezidentimizge hám qáwenderlerge minnetdarshılıǵımızdı bilediremiz,-deydi «Aqmańǵıt» posyolkalıq puqaralar jıyını, «Abat máhálle» kóshesi turǵını Tursınay Kómekova.
Rayonda bul baǵdardaǵı jumıslar dawam etpekte.

Qaraqalpaqstan xabar agentligi