Ózbekstan Respublikası Prezidentiniń 2022-jıl 19-yanvardaǵı “Máhállelerde jaslar menen islesiw sistemasın túp-tiykarınan jetilistiriw ilajları haqqında” ǵı qararı qabıl etildi. Bul qarardı turmısqa engiziw boyınsha máhállelerde jaslar menen islesiw jaqsı jolǵa qoyıldı.

Qarar tiykarında “Bir nuraniy–on jasqa juwapker” tańlawınıń Nókis rayonlıq basqıshı bolıp ótti. Tańlawǵa rayon boyınsha jaslarǵa ustazlıq etip kiyatırǵan nuranıylar arasınan aymaqlar basqıshında joqarı orınlardı iyelegen 6 nuraniy qatnastı.
Tańlaw barısında qatnasıwshılar úsh basqısh boyınsha óz-ara bellesip, jaslar tárbiyasındaǵı kórsetip atırǵan ruwxıy aǵartıwshılıq tájiriybeleri boyınsha maǵlıwmatlar berip ótti.
Tańlaw juwmaǵında «Tóktaw» mákan puqaralar jıyınınan Keńesbay Rozımbaev birinshi orındı iyelep, Respublikalıq basqıshqa jollama aldı.
-Tez pát penen rawajlanıp baratırǵan internet dáwirinde jaslardıń tárbiyasına qatań qaramasaq unamsız jaǵdaylarǵa alıp keliwi múmkin. Sonlıqtan shańaraqta óz perzentlerimizge qosa qońsı-qobanıń, máhállede jasawshı jaslardıń tárbiyasına itibar menen qarawımız lazım. Bul baǵdarda barlıq jası úlken nuranıylardı biypárwa bolmawǵa shaqıraman,-deydi K.Rozımbaev.
Jeńimpazlar shólkemlestiriwshiler tárepinen bahalı sawǵalar hám aqshalay sıylıqlandı.

Qaraqalpaqstan xabar agentligi