Tashkent qalasındaǵı “Bunyodkor” stadionında amerikalı belgili qosıqshı Jennifer Lopestiń “Up All Night” atlı koncert baǵdarlaması bolıp ótti.

Kino hám muzıka áleminde birdey ayqın ornı bar, hár bir koncerti mıńlaǵan auditoriyanı jámleytuǵın qosıqshı Aziyadaǵı óziniń eń úlken shouın Ózbekstanda ótkerdi.
Belgili aktrisa hám estrada juldızınıń 8-iyulden 12-avgustqa shekem ótkerilip atırǵan jáhán gastrolınan 13 mámlekettiń 20 qalası orın alǵan. Olardıń arasında Ispaniya, Vengriya, Italiya, Túrkiya, Polsha, Rumıniya, BAÁ, Egipet, Qazaqstan, Armeniya sıyaqlı mámleketler bar.
Shólkemlestiriwshilerdiń málim etiwinshe, 25 mıń bilet satılǵan. Qızıqlı fakt sonda, bul biletlerdiń 15 mıńnan aslamı, yaǵnıy 67 procenti sırt elliler tárepinen alınǵan. Sonnan 7,5 mıńnan aslamın rossiyalılar, 2,5 mıńnan aslamın qazaqstanlılar, sonday-aq, Evropa hám basqa da mámleket puqaraları satıp alǵan.
Atap ótiw kerek, koncert ushın elimizge kelip atırǵan puqaralar sayaxat etiwdi de maqset etken hám keminde 4-6 kúnlik tur paketler satıp alǵan. Házir turizm máwsimi emesligin esapqa alsaq, jazdıń ıssı kúnlerinde turistlerdiń bunday aǵımı álbette jaqsı kórsetkish bolıp esaplanadı.

Behruz Xudoyberdiev, Iskandar Ismatov (video), ÓzA