Ózbekstan Respublikası Shańaraq hám hayal-qızlar komiteti tárepinen shańaraqlıq kelispewshilikler hám shańaraqlıq ajırasıwlardıń aldın alıw, perzent tárbiyasına juwapkershilikli qatnasta bolıwda psixologiyalıq xızmetlerdi jolǵa qoyıw máselelerine baǵıshlanǵan sóylesiw ótkerildi.

Bas ministrdiń orınbasarı – Shańaraq hám hayal-qızlar komitetiniń baslıǵı Zulayho Mahkamova shańaraqlıq ajırasıwlardıń aldın alıw, shańaraqlıq ortalıqtıń salamatlıǵın támiyinlew búgingi kúnde áhmiyetli ekenin atap ótti.
Májiliste keltirilgen maǵlıwmatlarǵa bola, shańaraqlıq ajırasıwlarǵa tiykarǵı sebepler arasında úshinshi shaxstıń aralasıwı (15%), nekege tayar emeslik (14%), perzentsizlik (11%), migraciya hám uzaq waqıt birge jasamaw (10%) sıyaqlı faktorlar atap ótildi.
Bunday kewilsiz processlerde 17 mıń 13 bala ákesiz yamasa anasız qalǵan. Ajırasıwlar sanınıń artıwı jámiyettegi turaqlılıqqa da úlken qáwip tuwdırıp atırǵanı atap ótildi.
Dógerek sáwbeti qatnasıwshıları tárepinen bar mashqalalardı sheshiw, jámiyette salamat hám turaqlı shańaraqlardı qáliplestiriwge qaratılǵan bir qatar áhmiyetli ilajlar belgilep alındı. Hár bir máhállede isenimli hám nátiyjeli psixologiyalıq xızmetler sistemasın jolǵa qoyıw, jaslardı turmıs sınaqlarına tayarlaw maqsetinde nekege tayarlıq kursların keńnen engiziw zárúrligine itibar qaratıldı.
Sonıń menen birge, shańaraqlarda kelispewshilik hám ajırasıwǵa beyim jaǵdaylardı erte anıqlaw, psixologiyalıq járdem hám profilaktikalıq ilajlar kóriw, mekteplerde jumıs alıp barıp atırǵan psixologlardıń bilim hám sheberligin arttırıw, metodikalıq qollanbalar jaratıw, ata-analardı shańaraqlıq qatnasıq, perzent tárbiyası hám keńpeyillik ruwxında úgit-násiyatlaw hám túsindiriw jumısları menen qamtıp alıw áhmiyetli ekenligi atap ótildi.
Májiliste atap ótilgenindey, respublika boylap shólkemlestirilgen “Shańaraq hám hayal-qızlar orayları” arqalı búgingi kúnge shekem 10 mıń 89 kelispewshilikli shańaraq jarastırılǵan, 10 mıń 100 hayal ruwxıy qollap-quwatlaw hám psixologiyalıq járdem menen qamtıp alınǵan. Bul kórsetkishler psixologiyalıq xızmetlerdiń qanshelli tásirsheń hám turmıslıq áhmiyetke iye ekenin ayqın dálillep tur.
Búgin biz jámiyettiń eń áhmiyetli ústini – shańaraqtı saqlaw hám bekkemlew ushın anıq hám nátiyjeli ilajlar kóriwimiz zárúr, – dedi Zulayho Mahkamova. – Hár bir perzent salamat ortalıqta ósiwi, hár bir hayal ózin qorǵalǵan hám qollap-quwatlanǵan dep seziwi kerek. Bul baǵdarda bárshemizden awızbirshilik, qatnas jasawda professionallıq hám eń áhmiyetlisi, júrekten sezinip jumıs islew talap etiledi.
Ilaj juwmaǵında tiyisli ministrlikler hám uyımlarǵa anıq wazıypalar júklendi. Respublika kóleminde arnawlı jumısshı toparlardı dúziw, hár bir aymaqta psixologiyalıq xızmetlerdiń sapasın bunnan bılay da jaqsılaw, shańaraqlıq mashqalalarǵa qatnas jasawda ilimiy, ámeliy hám adamgershilik normaların keńnen qollanıw boyınsha áhmiyetli qararlar qabıl etildi.

ÓzA