AQSh Prezidenti Donald Tramp 8-avgust, juma kúni Aq úyde Ázerbayjan Prezidenti Ilham Aliev hám Armeniya Bas ministri Nikol Pashinyan menen ushırasadı. Bul sóylesiw Kavkaz regionında turaqlı tınıshlıq ornatıwǵa qaratılǵan áhmiyetli diplomatiyalıq háreket sheńberinde ótedi, dep xabar berdi Euronews.

Armeniya húkimeti keshe Pashinyannıń AQShqa rásmiy saparı haqqında málim etti: – 7-8-avgust kúnleri Armeniya Respublikası Bas ministri Nikol Pashinyan AQShqa sapar etedi. Sapar sheńberinde ol Prezident Donald Tramp penen eki tárepleme ushırasıw ótkerip, Armeniya – AQSh strategiyalıq birge islesiwin bekkemlew máselesin dodalaydı. Sonday-aq, Ázerbayjan basshısı Ilham Alievtiń qatnasıwında úsh tárepleme sóylesiw de ótkeriledi.
“The Washington Post” jazıwınsha, Tramp bul ushırasıw arqalı Erevan hám Baku arasındaǵı kóp jıllıq tartıstı juwmaqlaw hám tınıshlıq kelisimine erisiwdi maqset etken. Túrli dárekler ushırasıw juwmaǵında tınıshlıq kelisiminiń járiyalanıw itimalı bar ekenligin atap ótpekte.
2024-jıl 13-mart kúni Armeniya Sırtqı isler ministrligi tınıshlıq shártnaması joybarı Ázerbayjan menen kelisilgenin hám Erevan hújjetke qol qoyıw waqtı hám ornı boyınsha sóylesiwge tayar ekenin málim etken edi.
Házirgi waqıtta Ázerbayjan SIM baspasóz xatkeri Oyxon Hojizoda bul kelisim bir neshe shártler orınlanǵan jaǵdayda ámelge asıwı múmkin ekenin aytqan. Máselen, Armeniya Konstituciyasına usı hújjette sáwlelengen Ázerbayjanǵa baylanıslı aymaqlıq dawdı biykarlaytuǵın ózgeris kirgiziliwi kerek. Buǵan juwap retinde, Pashinyan keleshekte jańa Konstituciya qabıl etiw baslaması menen shıǵıwı múmkin ekenin bildirgen. Jáne bir shárt arqalı Evropada qáwipsizlik hám birge islesiw shólkemi janındaǵı Minsk toparın rásmiy biykar etiw soralǵan. Baku bul strukturanı gónergen, dep biledi. Erevan bolsa, óz gezeginde, buǵan mámlekettiń ishki jumısı sıpatında qaraydı.
10-iyul kúni Aliev hám Pashinyan Abu-Dabide 5 saat sóylesiw ótkerdi. Sóylesiw dawamında Zangezur koridorı – Armeniyanıń Syunik wálayatı arqalı Ázerbayjannıń tiykarǵı bólegin Naxchivon Avtonom Respublikası menen baylanıstıratuǵın tranzit jolı tiykarǵı másele sıpatında kóterildi. Erevan bul jolǵa ruqsat beriwge tayar ekenin bildirgen halda, joybardıń huqıqıy statusı hám jol qadaǵalawı boyınsha anıq kelisim talap etpekte.
Vashingtondaǵı ushırasıwlar usı máselelerdi qay dárejede sheshetuǵını bir neshe kún ishinde ayqınlasadı.

Kenja Bekjonov, Anvarxwja Ahmedov (video), ÓzA