Bozataw rayonındaǵı 2-sanlı ulıwma bilim beriw mektebinde nuraniylar hám jaslar ushırasıwı bolıp ótti. Ilajda “Bozataw” MPJda jasaytuǵın nuranıylar, mámleketlik hám jámiyetlik shólkemlerde miynet etip atırǵan kekse áwlad wákilleri bolǵan deputatlar hám jaslar qatnastı.

Mámleketimizde sońǵı jılları kekse áwladtı sociallıq qollap-quwatlap, salamatlandırıw, bos waqıtların mazmunlı ótkerip, jámiyetlik turmıstaǵı belsendiligin arttırıwǵa ayrıqsha itibar qaratılmaqta.
Prezidentimizdiń 2023-jıl 11-marttaǵı “Kekselerdi hár tárepleme qollap-quwatlaw sonday-aq, olardıń sociallıq belsendiligin arttırıwǵa baylanıslı qosımsha ilajlar haqqında”ǵı qararı bul baǵdardaǵı jumıslardıń nátiyjeliligin arttırıw hám kekse áwlad wákilleriniń bay turmıslıq tájiriybesinen aqılǵa uǵras paydalanıwda áhmiyetli faktor bolmaqta.
Qarardıń orınlanıwı boyınsha Bozataw rayonında da «Bir nuraniy on jasqa juwapker» principine muwapıq jaslar hár bir máhálledegi turmıslıq tájiriybege iye, zamanagóy pikirleytuǵın belsendi nuranıylarǵa, sonday-aq, mashqalalı shańaraqlardıń hár birine “Kekseler másláháti” toparlarınıń bir aǵzası biriktirilgen. Bul jumıslar profilaktikalıq esapta turǵan jaslardı salamat turmısqa qaytarıw, jánjelli shańaraqlardı jarastırıw hám ajırasıwlardıń aldın alıwda óz nátiyjesin bermekte.
Ushırasıwda ÓzLiDeP tiń rayonlıq apparatı baslıǵı Begdiyar Qutlımuratov sózge shıǵıp, jaslardı máhálledegi turmıslıq tájiriybege iye bolǵan, zamanagóy pikirleytuǵın belsendi nuranıylarǵa biriktiriw arqalı olardı Watanǵa sadıqlıq, milliy qádiriyatlarımızǵa húrmet ruwxında tárbiyalaw boyınsha ámelge asırılıp atırǵan jumıslar haqqında keń túrde aytıp ótti.
Ilajda nuraniylar hám jaslar jaqınnan sáwbetlesip, ózlerin qızıqtırǵan sorawlarına juwap aldı.

Qaraqalpaqstan xabar agentligi