Nókis rayonı «Diyqan arna» mákan puqaralar jıyını aymaǵında Diyqan arna shańaraq shıpakerlik punktınıń ashılıw máresimi bolıp ótti.

Ilajǵa rayon hákimi Z.Zaytov, Qaraqalpaqstan Respublikası Densawlıqtı saqlaw ministri M.Qurbanov, rayon prokurorı P.Xalmuratov, Birlesken Milletler Shólkemi Rawajlanıw baǵdarlamasınıń awıllıq jerlerdi turaqlı rawajlandırıw boyınsha qánigesi G.Japaqova, medicina xızmetkerleri hám keń jámiyetshilik wákilleri qatnastı.
Ashılıw saltanatında rayon hákimi Z.Zaytov hám basqalar sózge shıǵıp, jańa imarattıń paydalanıwǵa tapsırılıwı menen jıynalǵanlardı qutlıqladı.
Sońǵı jılları elimizde barlıq tarawlar qatarında medicina tarawına da ayrıqsha itibar qaratılıp, bul baǵdarda húrmetli Prezidentimizdiń tikkeley basshılıǵında kólemli jumıslar ámelge asırılmaqta. Usı tiykarda xalqımızdıń densawlıǵın jaqsılaw, olarǵa sapalı medicinalıq xızmet kórsetiw, medicina mákemeleriniń materiallıq-texnikalıq bazasın bekkemlew hám baslanǵısh medicinalıq xızmet kórsetiw mákemeleriniń jumısın túpkilikli jetilistiriw jańa basqıshqa kóterilip atır.
Shıpakerlik punkt kúnine 50 nawqastı kabıllaw múmkinshiligine iye bolıp, imaratta laboratoriya, shanshıw hám emlew xanası, aftoklav xanaları puqaralar ushın xızmet etedi. Ilaj dawamında, miymanlar imarattıń ishki imkaniyatları menen tanısıp, qolaylıqların joqarı bahaladı.
Bul imarat OPEK xalıqaralıq rawajlanıw fondı qatnasıwında «Awıllıq jerlerdi turaqlı rawajlandırıw» joybarın ámelge asırıw ilajları haqqında»ǵı qarar tiykarında 3mlrd.40 mln sumlıq qarjı ajıratılıp, qurıp pitkerildi.

Qaraqalpaqstan xabar agentligi