Mámleketimizge haywanlardıń juqpalı kesellikleriniń kirip keliwiniń aldın alıw, veterinar tınıshlıqtı támiyinlewde huqıqıy tiykar bolıp xızmet etiwge qaratılǵan nızam qabıl etildi. Sonıń menen birge, jańa hújjette haywan iyelerine de bir qatar imkaniyatlar payda bolatuǵını sáwlelendirilgen.

Ózbekstan Respublikasınıń 2025-jıl 6-avgustta “Haywanlardı identifikaciyalaw, dizimge alıw hám baqlaw haqqında”ǵı nızamı qabıl etildi.
Bárinen burın sonı atap ótiw kerek, bul nızam menen haywanlardı identifikaciyalaw, dizimge alıw hám baqlaw tarawındaǵı qatnasıqlar tártipke salınadı.
Yaǵnıy, bul nızam tiykarında haywanlardı identifikaciyalaw boyınsha birden-bir mámleketlik siyasat júrgiziledi. Sharwa malları hám haywan iyeleriniń birden-bir reestrin jaratıw hám olardıń esabın júrgizetuǵın elektron málimleme sisteması engiziledi.
Aytayıq, haywanǵa tiyisli iyelik huqıqına dawa etiw imkaniyatı payda boladı. Haywannıń haqıyqıy iyesin identifikaciyalaw arqalı anıqlawǵa járdem beredi. Haywan iyelerine ótkerilgen diagnostikalıq tekseriw nátiyjeleri hám emlew jumısları haqqındaǵı maǵlıwmatlardı alıw imkaniyatı jaratıladı.
Bar sharwa mallarınıń bas sanı haqqında birden-bir elektron maǵlıwmatlar bazası jaratıladı.
Sharwa mallarınıń oǵada qáwipli juqpalı keselliklerine mámleket tárepinen biypul tolıq profilaktikalıq shanshıwǵa erisiledi. Nátiyjede haywanlar arasındaǵı epidemiyalıq qáwiptiń aldı alınadı. Identifikaciyalanǵan haywanlardan alınatuǵın ónimlerdiń sapası hám qáwipsizligi támiyinlenip, ishki hám sırtqı bazarlarda satılıwı kepillenedi.
Kesellikler hám túrli sebepler menen nabıt bolǵan (haram ólgen) haywanlar góshin jasırın satıw nızam menen qadaǵan etiledi hám paydalanıwǵa jaramsız sharwashılıq ónimleriniń sawdasına shek qoyıladı.
Hár bir bas qara mal haqqındaǵı maǵlıwmatlar birden-bir elektron bazaǵa kirgiziledi hám tiri qara mallar sawdası mánzilli ámelge asırıladı. Sharwa mallarınıń saqlanıwı hám migraciyası tártipke salınadı hám turaqlı monitoring etiw sisteması jaratıladı. Eń áhmiyetli tárepi sonda, identifikaciyalawdan haywan iyelerine artıqsha júk túspeydi. Yaǵnıy, bir mártelik biypul tolıq identifikaciyalap beriledi.
Shańaraq iyeleri sharwa malları tuwılǵanda, satılǵanda yamasa soyılǵanda smartfon telefonı arqalı yamasa awızsha múrájatı menen dizimge alınadı hám dizimnen shıǵarıladı. Onda hesh qanday qarjı talap etilmeydi.
Bul nızamnıń qabıl etiliwi mámleketimizdiń Jáhán sawda shólkemine aǵza bolıw processlerin jedellestiredi.

I.Avvalboev, ÓzA