Ózbekstan Respublikası Prezidentiniń 2024-jıl 5-apreldegi “Jaslarǵa jer ajıratıw arqalı olardıń dáramatların arttırıw hám bántligin támiyinlew, sonday-aq, jańa jer maydanların ózlestiriw ilajları haqqında”ǵı qararınıń orınlanıwı sheńberinde Nókis rayonında bir qatar ámeliy jumıslar ámelge asırılmaqta.

Usı qararǵa tiykarlanıp, Nókis rayonı «Aqterek» mákan puqaralar jıyınındaǵı jumıssız, biraq diyqanshılıqqa qızıǵıwshılıǵı hám islew tileginde bolǵan jaslarǵa ashıq-aydın aukcion arqalı 1 gektarǵa shekemgi jer maydanları ajıratıp berildi. Bul arqalı tek ǵana jaslardıń turaqlı bántligi támiyinlenip qoymastan, al olardıń óz miyneti menen dáramat tabıwına da keń imkaniyat jaratıldı.
Házirgi waqıtta, ajıratılǵan jerlerde qawın-ǵarbız hám basqa da awıl xojalıǵı eginleri jetistirilmekte. Ónimdarlıǵı joqarı, bazar talabına say, ekologiyalıq taza ónimler ishki bazarda da, eksport baǵdarlarında da talapqa iye bolıp esaplanadı.
-Prezidentimiz qararı menen biziń máhállemizdegi jumıssız 56 jasqa jer ajıratılıp berildi. Usı jaslardıń 30 ı jerlerine palız eginlerin egip atırǵan bolsa, 26 sı dánli eginlerdi egip jetistirmekte. Házirgi kúnde jaslarımız islegen miynetlerine say dáramat tawıp, shańaraǵına qosımsha dáramat kirigizip hám xalqımızǵa mazalı, sapalı palız ónimlerin jetkerip kelmekte,-deydi «Aqterek» MPJ jaslar jetekshisi Qoblan Sarsenbaev.
Máhálle jaslarınıń biri Ruslan Qádirbergenov ózi, inisi hám kelinsheginiń atına 3 gektar jer alıp, eki jıldan berli qawın-ǵarbız hám basqa da palız eginlerin egip jetistirip kelmekte.
-Ótken jılı eginlerimiz onshelli mol daqıl bermedi. Kelesi jılǵa jerdi jaqsılap tayarlap, bıyıl sol miynetlerimizdiń jemisin kórmektemiz. Házirgi waqıtta mazalı gúrbek qawınlardı jıynap, Xorezm hám Buxara wálayatlarına satıp atırmız. Házirgi waqıtta on jastıń bántligin támiyinlewge eristim. Biz jaslarǵa usınday imkaniyatlardı jaratıp berip atırǵan Prezidentimizge minnetdarshılıǵımız sheksiz. Jumıssız jaslarǵa aytarım, elimizde jaratılıp atırǵan imkaniyatlardan orınlı paydalanıp, miynet etiwden qashpasa, jaqsı tabıslarǵa erisedi,-deydi R.Qádirbergenov.

G.Turdıshova, Qaraqalpaqstan xabar agentligi