Qaraqalpaqstan Respublikası Bajıxana basqarmasınıń Kontrabandaǵa qarsı gúresiw bólimi xızmetkerleri tárepinen MQX, IIM xızmetkerleri menen birgelikte alınǵan maǵlıwmatlar tiykarında Nókis qalasındaǵı jol patrul xızmeti ornında operativ ilaj ótkerildi.

“Tashkent-Nókis” jónelisinde háreketlenip kiyatırǵan jeńil avtotransport quralı toqtatılıp, usı avtotransporttaǵı jolawshı hám oǵan tiyisli bolǵan sumkalar gúwalardıń qatnasıwında kózden ótkerilgende, puqaranıń ústindegi ishki kiyimlerine jasırın túrde jasırılǵan 2 dana móldir polietilen paketlerde ótkir iyisli, toq qońır reńdegi, oramı menen salmaǵı 58,12 gramm bolǵan “gashish” náshebentlik zatı bar ekenligi anıqlandı.
Operativ ilaj dawam ettirilip, bul puqaranıń Nókis qalası aymaǵındaǵı jasaw úyi kózden ótkerilgende, onıń úyinde 3,58 gramm “marixuanna”, 1 gramm «opiy», 8 gramm “kannabis” náshebentlik ósimliginiń tuqımları, 1 gramm “gashish” náshebentlik quralları hám 1 dana náshebentlik quralların ólshewde paydalanılǵan elektron tárezi bar ekenligi anıqlanıp, ayǵaqlı dálil retinde waqtınsha saqlawǵa alındı.
Bul jaǵday boyınsha Bajıxana basqarması tárepinen Ózbekstan Respublikası Jınayat kodeksiniń tiyisli statyaları menen jınayat isi qozǵatıldı.
Maǵlıwmat ushın atap ótetuǵın bolsaq, bıyılǵı jıldıń basınan berli Qaraqalpaqstan Respublikası Bajıxana basqarması tárepinen 665 gramm náshebentlik qurallarınıń mámleketimiz shegaraları arqalı háreketleniwi hám ishki aymaqta aylanısta bolıwınıń aldı alınǵan.

Qaraqalpaqstan xabar agentligi