BMSh Azıq-awqat hám awıl xojalıǵı shólkemi – FAO Tashkent irrigaciya hám awıl xojalıǵın mexanizaciyalaw injenerleri institutı – Milliy izertlew universitetine zamanagóy EM38-MK2 Ground Conductivity Meter – topıraqtıń ótkizgishligin ólshew qurılmasın usındı.

Bul aldınǵı texnologiya ekologiyalıq mashqalalarǵa dus kelgen aymaqlarda topıraq hám suwdıń sapasın tereń bahalaw imkaniyatın beredi. Ilaj FAO hám BMSh Rawajlanıw baǵdarlamasınıń Aralboyı regionındaǵı ekologiyalıq mashqalalardı saplastırıw boyınsha birgeliktegi joybarı sheńberinde ámelge asırıldı.
– Bul úskene topıraqtıń elektr ótkizgishligi, magnit sezgirligin anıq hám tez ólshew imkaniyatın beretuǵın zamanagóy qural bolıp, ol suwǵarıwdı ilimiy tiykarda rejelestiriw, jer resurslarınan nátiyjeli paydalanıw hám ekologiyalıq tiklew ilajların belgilewde úlken áhmiyetke iye boladı, – dedi joybardıń milliy koordinatorı Abdumalik Namozov.
FAO hám Milliy izertlew universiteti arasındaǵı birge islesiw ilimiy izertlew hám atızda baqlawlardı kúsheytiwge xızmet etedi. Usınılǵan texnologiya, sonday-aq, shorlanıw, ıǵallıq dárejesi hám jer astı strukturaları haqqında tez hám isenimli maǵlıwmatlar alıw imkaniyatın da beredi.
Qurılma awıl xojalıǵı jerlerin tallaw, ulıwma topıraqtanıw hám basqa da ilimiy izleniwlerde keńnen qollanılıwı múmkin. Alınǵan nátiyjeler arqalı shorlanıw, ıǵallıq muǵdarı hám jer astı geologiyalıq strukturaları anıqlanadı. Bul bolsa ásirese, Aralboyı regionında topıraq hám suw resursların hár tárepleme bahalawda áhmiyetli rol atqaradı.
FAOnıń mámleketimizdegi wákilxanasınıń ÓzAǵa xabar bergenindey, EM38-MK2 sıyaqlı zamanagóy diagnostika qurallarınıń engiziliwi Ózbekstannıń ekologiyalıq mashqalalarǵa dus kelip atırǵan aymaqlarında turaqlılıqtı támiyinlewge qaratılǵan, maǵlıwmatlarǵa tiykarlanǵan sheshimlerge qaray áhmiyetli qádem bolıp esaplanadı.

ÓzA