Sanaat tarawındaǵı izbe-iz rawajlanıw, isbilermenlik ortalıǵınıń jaqsılanıwı menen elimizde jańa óndiris kárxanaların qurıwǵa úlken itibar qaratılmaqta. Bul process tek ǵana ekonomikalıq ósiwdi támiyinlep qoymastan, al xalıqtıń bántligin arttırıwǵa da xızmet etpekte.

Tórtkúl rayonı “Oqboshli” awılı aymaǵında tırnaq tası qoyılǵan jańa paxtanı qayta islew zavodı da usı maqsette ámelge asırılıp atırǵan joybarlardan biri bolıp esaplanadı. Bul kárxana “Usta Meretdurdi” JShJ basshısı I.Baynazarovtıń baslaması menen qurılıp atır. Bul joybardıń ulıwma bahası 8 milliard sumdı quraydı,-dep maǵlıwmat beredi rayon hákimligi Málimleme xızmeti bólimi.
Ózbekstan Respublikası Prezidentiniń PQ-10-sanlı qararına muwapıq, isbilermenge 1,5 gektar jer maydanı ajıratılıp, 4 milliard sumlıq jeńilletilgen kredit te berildi. Házirgi waqıtta qurılıs jumısları belgilengen reje tiykarında jedel pátlerde alıp barılmaqta.
Zavod qurılısınıń barısı rayon hákimi hám juwapker shólkemlerdiń basshıları tárepinen ornında úyrenilip, obektte ámelge asırılıp atırǵan jumıslar menen jaqınnan tanıstı.
Zavod tolıq iske qosılǵannan soń, jılına 500 tonna paxtanı qayta islew quwatlılıǵına iye boladı. Sonday-aq, rayon orayınan uzaqta jaylasqan aymaqta 20 dan aslam jergilikli xalıq turaqlı jumıs ornına iye boladı.
Bul baslama – elimizde isbilermenlikti qollap-quwatlaw, jumıssızlıqtı azaytıw hám awıllıq jerlerde sanaat potencialın arttırıw baǵdarındaǵı ámeliy qádemlerden biri bolıp esaplanadı.

Qaraqalpaqstan xabar agentligi