BMShtıń teńizge shıǵıw imkaniyatı bolmaǵan rawajlanıp atırǵan mámleketler boyınsha konferenciyası sheńberinde Ózbekstan Respublikası Prezidenti Shavkat Mirziyoevtiń BMSh Bas xatkeri Antoniu Guterrish penen ushırasıwı bolıp ótti.

Global hám regionallıq rawajlanıwdıń áhmiyetli máseleleri, sonıń ishinde, BMSh Bas Assambleyasınıń bolajaq 80-yubiley sessiyasın ótkeriw máseleleri kórip shıǵıldı.
Usı mánide, Ózbekstan jetekshisi Bas xatkerdiń xalıqaralıq tınıshlıq hám turaqlılıqtı támiyinlew, BMSh hám onıń tiykarǵı institutların zamanagóy reallıqqa beyimlestiriw maqsetinde reformalaw baǵdarındaǵı baslamaların isenimli qollap-quwatladı.
Ózbekstan menen BMSh arasındaǵı kóp táreplemeli birge islesiwdi bunnan bılay da keńeytiw, Antoniu Guterrishtiń ótken jılı iyul ayındaǵı mámleketimizge saparı dawamında erisilgen kelisimlerdi ámelge asırıwǵa ayrıqsha itibar qaratıldı.
Búgingi kúnde 160 birgeliktegi baǵdarlama hám joybar tabıslı ámelge asırılıp atırǵanı qanaatlanıwshılıq penen atap ótildi.
Keyingi bir neshe jılda Ózbekstannıń baslaması menen BMSh Bas Assambleyasınıń 13 rezolyuciyası qabıl etildi.
Usı jılı Shólkemniń tiykarǵı strukturaları hám institutları, sonıń ishinde, BMSh-Xabitat hám YuNISEF basshıları Ózbekstanǵa keldi, Tashkentte “BMSh-Hayal-qızlar” strukturasınıń wákilxanası ashıldı.
Mámleketlik xızmet máseleleri boyınsha forum birgelikte ótkerildi. Samarqand qalasında YuNESKO Bas konferenciyasınıń 43-sessiyasına qızǵın tayarlıq kórilmekte.
Mámleketimiz Global turaqlı rawajlanıw maqsetleri indeksi boyınsha eń aldınǵı bes mámleket qatarına kirdi. TRMǵa erisiw kózqarasınan BMSh penen birge islesiw boyınsha jańa bes jıllıq baǵdarlamaǵa qol qoyılıwı kútilmekte.
Oraylıq Aziyada integraciyanı tereńlestiriw, Awǵanstandı regionallıq birge islesiw processlerine tartıw máseleleri dodalandı.
Ushırasıw juwmaǵında tárepler ámeliy birge islesiwdi jáne de rawajlandırıw, birgeliktegi baǵdarlama hám joybarlardı keńeytiwge tayar ekenin atap ótti.

ÓzA