Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen ǵalaba xabar quralları wákilleri ushın press-tur shólkemlestirildi.

Ǵalaba xabar qurallarınıń wákilleri Nókis qalasındaǵı 27-sanlı mámleketlik mektepke shekemgi bilimlendiriw shólkemine alıp barılıp, ol jerde ámelge asırılıp atırǵan jumıslar menen tanıstırılıp, shólkem mısalında mámleketlik mektepke shekemgi bilimlendiriw shólkemlerinde autsorsing usılında salamat awqatlandırıwdı shólkemlestiriw processleri haqqında maǵlıwmatlar berildi.
Atap ótilgenindey, házirgi kúnde elimizdegi 6798 mámleketlik mektepke shekemgi bilimlendiriw shólkemleriniń 17,2 procentinde 83 isbilermenlik subekti tárepinen autsorsing usılında awqatlandırıw jolǵa qoyılǵan. Qalǵan 5626 shólkemde dástúriy (satıp alıwshılar tárepinen azıq-awqat jetkerip beriw arqalı) usılda awqatlandırıw ámelge asırılmaqta.
Ministrler Kabinetiniń 2025-jıl 6-yanvardaǵı tiyisli qararında belgilengen wazıypalardıń orınlanıwın támiyinlew maqsetinde, autsorsing usılında salamat awqatlandırıw shólkemlestiriletuǵın mámleketlik mektepke shekemgi bilimlendiriw shólkemleriniń sanı, dizimi hám basqa da tiyisli maǵlıwmatlar tayarlandı.
Mektepke shekemgi hám mektep bilimlendiriwi ministrligi jáne Densawlıqtı saqlaw ministrligi janındaǵı Sanitariyalıq-epidemiologiyalıq tınıshlıq hám jámiyet salamatlıǵı komiteti menen birgelikte máwsimler kesiminde “Birden-bir máwsimlik menyu” islep shıǵıldı hám tastıyıqlandı.
Onda mámleketlik MShBShlarda “Birden-bir máwsimlik menyu” tiykarında azıq-awqat qárejetleriniń esabı (natural túrinde) “Balalar baqshası” málimleme sistemasında jaratılǵan moduller arqalı júrgiziledi.
Sonıń menen birge, bul esabat elektron húkimettiń uyımlar aralıq maǵlıwmatlar uzatıw tarmaǵı arqalı Ekonomika hám qarjı ministrliginiń málimleme sistemasına avtomat túrde jiberiledi.
Házirgi waqıtta aymaqlıq hákimlikler tárepinen bir tárbiyalanıwshı ushın bıyılǵı bahalar qáliplestirildi hám bir kúnlik salamat awqatlandırıw bahaları tastıyıqlandı.
Sonday-aq, Tovar-shiyki zat birjasınıń mámleketlik satıp alıwlar elektron sisteması arqalı mámleketlik mektepke shekemgi bilimlendiriw shólkemlerinde autsorsing usılında salamat awqatlandırıwdı shólkemlestiriw boyınsha isbilermenlik subektleri ushın daǵazalar jaylastırılǵan.
Autsorsing usılında salamat awqatlandırıwdı shólkemlestiriw processleri mámleketlik mektepke shekemgi bilimlendiriw shólkemlerinde jumıs alıp barıp atırǵan xızmetkerler hám ata-analar jáne basqa da jámiyetshilik wákillerinen ibarat Baqlaw keńesleriniń aǵzaları tárepinen turaqlı túrde baqlap barıladı.
– Mektepke shekemgi bilimlendiriw shólkemimizde házirgi waqıtta 14 toparda 397 bala tárbiyalanbaqta. Pán, sport, jámiyetlik-mádeniy baǵdarlar boyınsha jámi 5 dógerek jumıs islep turıptı. Bıyıl hám aldınǵı jıllarda «baslamalı byudjet» boyınsha joybarlarımız benen jeńimpaz bolıp, shólkemimizde kóplegen jumıslar islenip qalındı. Futbol hám voleybol maydanshası, atrakcionlar qurılıp, balalardıń waqıtlarınıń mazmunlı ótiwi ushın bir qatar qolaylıqlar jaratıldı. Bul ushın basshılarımızdan minnetdarshılıǵımız sheksiz,-deydi 27-sanlı mámleketlik mektepke shekemgi bilimlendiriw shólkeminiń direktorı J.Ermanova.
– Aldınǵı eki balam házir mektepte. Házirgi waqıtta kishkene qızım usı baqshada tárbiyalanıp atır. Barlıq balalarım da waqtında baqshalarda tárbiyalandı. Balalar baqshasınıń bala tárbiyası ushın paydalı tárepleri kóp, oqıydı, súwret saladı, qatarları menen oynaydı, oy-órisi keńeyip baradı. Bul baqshada balalar ushın barlıq sharayatlar jaratılǵanınan hám qızımnıń usı baqshada tárbiyalanıp atırǵanınan quwanıshlıman,-deydi S.Burieva.
Press-tur dawamında qatnasıwshılar baqshadaǵı sharayatlar menen tanısıp, qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi.