Ózbekstan Respublikası Bas prokurorı N.Ywldoshev tárepinen janılǵı-energiya resurslarınan nızamsız paydalanıw hám biykarǵa jumsalıwınıń aldın alıw, sonday-aq, energiya nátiyjeliligin arttırıw boyınsha Qaraqalpaqstan Respublikasında kórilip atırǵan ilajlar úyrenildi,-dep xabar bermekte Suw xojalıǵı ministrligi baspasóz xızmeti.

Atap aytqanda, Qaraqalpaqstan Respublikası Suw xojalıǵı ministrligi janındaǵı Qaraqalpaqstan nasos stanciyaları hám energetika basqarmasınıń Nókis-Kegeyli bólimine qaraslı “Kók-ózek” nasos stanciyasında agregatlardı energiya únemlewshi nasoslarǵa almastırıw, sonday-aq, stanciya jumısın quyash panelleri arqalı elektr energiyası menen támiyinlew jolı arqalı únemlilikke erisiw boyınsha ámelge asırılıp atırǵan shólkemlestiriw-texnikalıq ilajlar menen tanıstı.
Ilaj dawamında Qaraqalpaqstan Respublikası Suw xojalıǵı ministriniń orınbasarı T.Madireymov hám Qaraqalpaqstan nasos stanciyaları hám energetika basqarması baslıǵınıń orınbasarı N.Aralbaevlar nasos agregatların energiyanı únemleytuǵınına almastırıw, bunday kem quwatlılıqtaǵı nasos agregatların quyash panelleri járdeminde isletiw arqalı erisiletuǵın nátiyjelilik boyınsha prezentaciyalar menen qatnastı.
Prezidentimiz tárepinen 2025-jıl suw xojalıǵında “Nasoslardıń nátiyjeliligin arttırıw jılı”, dep belgilengeni atap ótilip, nasos stanciyalarınıń nátiyjeli islewin támiyinlew, energiya resurslarınan aqılǵa uǵras paydalanıw baǵdarındaǵı jumıslardı bunnan bılay da jedellestiriw boyınsha juwapkerlerge kórsetpeler berildi.
Sonday-aq, juwapkerler tárepinen Kegeyli rayonı “Suw jetkerip beriw xızmeti” mámleketlik mákemesi esabındaǵı xojalıqlar aralıq hám ishki kanallardı betonlastırıw jumısları da kózden ótkerildi. Atap aytqanda, Júzim baǵ awıl puqaralar jıyını aymaǵındaǵı “Dáwlet nasos” jabında betonlastırıw jumısları ámelge asırılmaqta. Bul suw tarmaǵında betonlaw jumısları juwmaqlanǵannan soń 140 gektarǵa shamalas paxta maydanları hám 122 shańaraqtıń qıytaq jerleriniń suw támiynatı jaqsılanadı. Suw shıǵınların azaytıwǵa qaratılǵan bul baǵdardaǵı jumıslardı jedellestiriw boyınsha da tapsırmalar berildi.

Qaraqalpaqstan xabar agentligi