Mámleketimiz basshısınıń baslaması menen “Prezidenttiń qábiletli perzentleri” Milliy baǵdarlaması turmısqa keńnen engizilmekte. Bul potenciallı jaslardıń ármanına qanat baǵıshlamaqta.

Bul Milliy baǵdarlama ne hám oǵan kimler qabıl etiledi?
Milliy baǵdarlama elimizdiń ulıwma bilim beriw mekteplerinde bilim alıp atırǵan jaslardı dúnyanıń abıraylı joqarı oqıw orınlarına oqıwǵa tayarlawshı joybar bolıp esaplanıp, hár jılı 9-klasstı tamamlap, 10-klassqa ótken jaslar saylap alıw imtixanı arqalı qabıl etiledi. Saylap alıw imtixanı matematika hám inglis tili pánlerinen test túrinde alınadı.
Baǵdarlamaǵa respublika boyınsha jámi 1 mıń 500 oqıwshı qabıl etiledi hám qabıl etilgenlerge mentorlar biriktiriledi.
Bul mentorlar tárepinen arnawlı platforma arqalı sabaqlar shólkemlestiriledi. Sabaqlarda sırt eldiń jetekshi joqarı oqıw orınları tárepinen qoyılatuǵın talaplar hám oqıwshılar bul talaplarǵa qalay tayar bolıwı túsindiriledi.
Sonday-aq, Renessans dem alıw orayında Milliy baǵdarlama aǵzaları ushın hár jılı oflayn ushırasıwlar hám sheberlik sabaqları da ótkeriledi. Bilimli jaslarımız ushın sırt eldiń abıraylı universitetlerine bilimlendiriw saparları shólkemlestiriledi.
Sonıń menen birge, dúnyanıń Top-100 reytingindegi joqarı oqıw orınlarına 50 procent grant tiykarında qabıl etilgen baǵdarlama qatnasıwshılarınıń oqıw qárejetleri kvota sheńberinde qaplap beriledi.
Eń quwanıshlısı, sırt elde oqıytuǵın jaslar birden-bir jámiyetshilikke birlestirilip, elimiz benen turaqlı baylanısları hám qaytıp kelgennen keyin jumıs penen támiyinlew de jolǵa qoyıladı.
Bul joybarǵa Prezident mektepleri hám Qánigelestirilgen bilimlendiriw mákemeleri agentligi sistemasındaǵı mektep oqıwshıları qabıl etilmeytuǵının atap ótiw kerek.
Milliy baǵdarlamaǵa usı jıl ushın 27 mıń 789 arza kelip túsken bolıp, bul talabanlardan 10-avgust kúni respublikamızdıń 13 aymaǵında saylap alıw imtixanı ótkeriledi.

N.Usmonova, ÓzA