Respublikalıq tez medicinalıq járdem orayı tárepinen birinshi márte “103” brigadalarınıń háreketin real waqıt rejiminde onlayn baqlap barıw jolǵa qoyıldı.

Bul tájiriybe-sınaq joybarına bola, endi paytaxt xalqı tez medicinalıq járdem brigadalarınıń qay jerde ekenligi hám qansha waqıtta shaqırıw mánziline jetip barıwın onlayn baqlap barıwı múmkin.
Densawlıqtı saqlaw ministrligi baspasóz xızmetiniń xabar beriwinshe, jańa joybar “Yandex Uzbekistan” kompaniyasınıń texnologiyalıq sheshimi tiykarında ámelge asırılıp, “103” brigadasınıń háreketleri brauzerde elektron karta arqalı, jaqın keleshekte bolsa “Yandex Go” mobil qosımshası járdeminde baqlap barıladı. Oǵan bola, “Tez járdem”ge múrájat etilgennen soń, sistema avtomat tárizde brigadanıń háreketi real waqıt rejiminde kórsetiletuǵın elektron kartaǵa silteme arqalı SMS-xabar jiberedi.
Joybardıń keyingi basqıshında paydalanıwshılar “Yandex Go” mobil qosımshasınan brigadanıń jaylasıwı hám onıń shama menen keliw waqtı haqqında push-bildiriw arqalı xabardar boladı. Qalaberdi, bul maǵlıwmattı tikkeley qosımsha arqalı da alıw múmkin.
Respublikalıq tez medicinalıq járdem orayınıń direktorı Abduvoitjon Gafurovtıń sózlerine bola, bul jańalıq, bárinen burın, tez medicinalıq járdem sistemasında ashıq-aydınlıqtı támiyinlew hám dispetcherlerdiń jumıs júklemesin azaytıwǵa xızmet etedi. Házirde bul sheshim Tashkent qalasında qıstawlı shaqırıwlar ushın ámel etedi.

M.Qosimova tayarladı, ÓzA