ÓzLiDeP Qaraqalpaqstan Respublikası Keńesiniń “Jaslar mashqalaların úyreniw hám isbilermenlikti qollap-quwatlaw” bólimi tárepinen “Jas isbilermenler ligası” joybarı sheńberinde Jasıl baǵ MPJda jaylasqan jaslar dem alıw orayında seminar-trening shólkemlestirildi.

Seminar-treningti shólkemlestiriwden tiykarǵı maqset – jas isbilermenlerge jaratılıp atırǵan imkaniyatlardı keńnen úgit-násiyatlaw, olarda biznes júrgiziwge bolǵan qızıǵıwshılıqtı arttırıw hám ámeliy kónlikpeler beriw bolıp tabıladı.
Seminarǵa “Jaslar – keleshegimiz” qorınıń Qaraqalpaqstan Respublikası filialı qánigeleri qatnasıp, jaslarǵa isbilermenlik jumısın baslawı hám rawajlandırıwı boyınsha áhmiyetli bilim hám másláhátler berdi. Sonday-aq, qatnasıwshılarǵa mámleket tárepinen berilip atırǵan jeńillikler hám grantlar, biznes-reje dúziw, finanslıq sawatlılıq sıyaqlı áhmiyetli temalarda maǵlıwmatlar berildi.
– Búgingi seminar men ushın isbilermenlik ortalıǵın qáliplestiriw, jańa ideyalarımdı bizneske aylandırıwǵa jol kartası boldı. Keleshekte joqarı oqıw ornında oqıp atırǵan qánigeligim menen birge ózimniń kishi biznesimdi baslaw niyetim de payda boldı. Bunıń ushın seminar shólkemlestiriwshilerine minnetdarman,-deydi seminar qatnasıwshısı Albina Amangeldieva.
Ilaj dawamında jas isbilermenlerge baylanıslı nızam joybarları dodalanıp, qatnasıwshılardıń pikir-usınısları tıńlandı.

Qaraqalpaqstan xabar agentligi