Mámleketimizde investiciyalıq siyasattı túp-tiykarınan jetilistiriw hám ámelge asırıw barısında zamanagóy, sapalı jantasıw hám mexanizmlerdi engiziw, sonday-aq investiciyalıq processti jedellestiriw, ulıwma isbilermenlik sharayatın jaqsılaw boyınsha bir qatar ilajlar ámelge asırılmaqta.

Bul ilajlar ekonomika tarmaqların, sociallıq hám óndirislik infrastrukturalardı jedel rawajlandırıw hám modernizaciyalawǵa xızmet etpekte. Investiciyalıq ortalıqtıń jaqsılanǵanı, kerekli sharayatlardıń jaratılǵanı nátiyjesinde 2025-jıldıń yanvar-iyun ayları juwmaǵı menen Respublikanıń tiykarǵı kapitalın kóbeytiwge 10 trillion 265,4 mlrd. sumnan aslam investiciya kirgizilip, sonnan sırt el investiciyaları hám kreditleri 7 trillion 47,8 mlrd. sumdı yamasa 545,4 mln. AQSh dolların quradı.
– Qaraqalpaqstan Respublikasına tiykarǵı kapitalǵa kirgizilgen investiciyalardıń 3671,8 mlrd. sumı taw-kán sanaatına, 1360,5 mlrd. sumı elektr, gaz benen támiyinlewge, 1169,2 mlrd. sumı qayta islew sanaatına, 805,1 mlrd. sumı tasıw hám saqlaw xızmet túrine, 442,5 mlrd. sumı awıl, toǵay hám balıqshılıq xojalıǵı xızmet túrlerine jumsalǵan,-deydi Statistika basqarması Investiciya hám qurılıs statistikası bóliminiń baslıǵı S.Muxamatdinov.
2025-jıldıń yanvar-iyun aylarında ulıwma maydanı 458,6 mıń kv.m. bolǵan 2474 turaq jay pitkerip tapsırıldı. Sonnan 202,6 mıń kv.m. bolǵan 1165 turaq jaylar awıllıq jerlerge tuwra keledi.
Mámleketimizde xalıqtıń turmıs dárejesin jaqsılaw, ámeldegi óndiristi texnikalıq hám texnologiyalıq jaqtan qayta úskenelew, strategiyalıq áhmiyetke iye bolǵan tikkeley sırt el investiciyaların ózlestiriw hám resurslardan durıs paydalanıw baǵdarındaǵı aktiv investiciyalıq siyasattı alıp barıw boyınshap ilajlar nátiyjeli dawam etpekte.

Qaraqalpaqstan xabar agentligi