Ózbekstan Respublikası Oliy Majlisi deputatlarınıń orınlarda saylawshılar menen ushırasıwları dawam etpekte.

Oliy Majlis Nızamshılıq palatasınıń deputatı Shahnoza Joldasova Shımbay rayonındaǵı Berdaq MPJda jasaytuǵın ónerment Mivash Tórenazarovanıń shańaraǵında bolıp, onıń jumısları menen tanıstı. Ónerment on jıldan aslam waqıt dawamında óz úyinde qaraqalpaq xalqınıń milliy qara úy bezewlerin tayarlaw menen shuǵıllanıp kelmekte. Házirgi kúnde ónerment óziniń jumısın keńeytip, “Ustaz-shákirt” dástúrin dawam ettirgen halda, óz ónerin rayon jaslarına úyretip, olardıń bántligin támiyinlep kelmekte.
Sonday-aq, deputat rayondaǵı «Temir jol gúzarı” máhállesinde jasaytuǵın úyshi usta Salamat Qoblanbaevtıń ustaxanasında bolıp, onıń menen qaraqalpaq xalqınıń milliy qara úyin qurıw procesi, onda paydalanılatuǵın ekologiyalıq jaqtan taza ónimler, áwladtan-áwladqa miyras bolıp kiyatırǵan úyshilik óneri hám bul biybaha kórkem ónerdiń búgingi kúnge shekem jetip barıwı haqqında sáwbetlesti.
Ushırasıwlarda deputat tárepinen nızamshılıq tarawında júz berip atırǵan ózgerisler, jańalıqlar hám qabıl etilip atırǵan párman hám qararlardıń mazmun-mánisi hám áhmiyeti haqqında keń túrde maǵlıwmatlar berildi. Olardıń múrájatı hám pikir-usınısları tıńlanıp, pikir alıstı.

Qaraqalpaqstan xabar agentligi