Ózbekstanda birinshi márte kontreyler, sonıń ishinde, avtotransport quralların temir jol platformalarında tasıw boyınsha ámeliyat sınaǵı tabıslı ótkerildi. Bul joybar Tashkent mámleketlik transport universitetiniń ilimpazları tárepinen ámelge asırıldı.

Maǵlıwmatlarǵa bola, joybar ekologiyalıq taza, nátiyjeli hám intellektuallıq júk tasıw sistemasına jol ashpaqta.
Sınaq sheńberinde Tashkent qalası ishindegi júk aǵımı tallandı hám bul qala ishinde, regionallıq dárejede jańa multimodal logistika sheshimlerin engiziw imkaniyatın jaratpaqta. Tasıw procesinde jańasha bekkemlew qurılması qollanıldı. Ol avtotransporttı temir jol platformasına tez hám qáwipsiz jaylastırıw hám tasıwda isenimlilikti támiyinlewge xızmet etedi.
Joybar Ózbekstan Respublikası Innovaciyalıq rawajlanıw agentligi tárepinen qarjılandırılǵan bolıp, milliy transport sistemasında ekologiyalıq taza hám zamanagóy texnologiyalardı engiziw strategiyasınıń bir bólegi esaplanadı.
Bul sistema avtomobil jollarında tıǵılıstı azaytıw, atmosferaǵa shıǵarılatuǵın SO₂ muǵdarın qısqartıw, janılǵı hám ekspluataciya qárejetlerin únemlew hám logistika nátiyjeliligin arttırıw sıyaqlı processlerdi jeńillestiredi.
Sonday-aq, bul tájiriybe elimizde “jasıl” transport koncepciyasın turmısqa engiziw, intellektuallıq hám turaqlı júk tasıw infrastrukturasın rawajlandırıwǵa qoyılǵan áhmiyetli qádem sıpatında bahalanbaqta.

ÓzA