Senattıń Agrar, suw xojalıǵı máseleleri hám ekologiya komitetiniń májilisinde “Atız shetlerinde awıl xojalıǵı ónimlerin jetistiriw sistemasınıń jetilistiriliwi múnásibeti menen Ózbekstan Respublikasınıń ayırım nızam hújjetlerine qosımshalar hám ózgerisler kirgiziw haqqında”ǵı nızam dáslepki tárizde dodalandı.

Májiliste awıl xojalıǵına mólsherlengen jer uchastkalarınıń atız shetlerindegi kanallar, suwǵarıw hám kollektor-drenaj tarmaqları átirapındaǵı maydanlarda awıl xojalıǵı ónimlerin jetistiriwdi jolǵa qoyıw arqalı xalıqtı azıq-awqat ónimleri menen kepillikli támiyinlew ilajlarınıń ámelge asırılıp atırǵanı atap ótildi.
Sonıń menen birge, azıq-awqat ónimlerin kóbeytiw, sırtqı bazarlarǵa talap joqarı bolǵan awıl xojalıǵı ónimlerin jetkerip beriw arqalı eksport kólemin keńeytiw, ásirese, jerlerden únemli paydalanıw imkaniyatın arttırıw zárúrligi júzege kelmekte.
Nızam menen Hákimshilik juwapkershilik haqqındaǵı kodekske hám Salıq kodeksine awıl xojalıǵı ónimin jetistiriwshilerge awıl xojalıǵına mólsherlengen jer uchastkalarınıń atız shetlerindegi kanallar, suwǵarıw hám kollektor-drenaj tarmaqları átirapında nızamshılıqqa muwapıq awıl xojalıǵı ónimlerin jetistiriw belgilengen maydanlarda hám múddetlerde optimal egin ekpew ushın hákimshilik juwapkershilikti belgilew jáne jer uchastkasınıń optimal egin egilmegen bólegi ushın jer salıǵın arttırılǵan muǵdarda esaplawǵa qaratılǵan qosımshalar hám ózgerisler kirgizilmekte.
Senatorlardıń atap ótkenindey, bul nızamnıń qabıl etiliwi xalıqtı tiykarǵı túrdegi azıq-awqat ónimleri menen kepillikli támiyinlewge hám awıl xojalıǵı ónimlerin jetistiriwdi nátiyjeli shólkemlestiriw hám kóbeytiw arqalı mámlekettiń eksport kórsetkishlerin jaqsılawǵa xızmet etedi.
Nızamdı ekspertler hám qánigelerdiń qatnasıwında jáne bir márte tallaw, tiyisli ministrlikler hám uyımlardıń pikir-usınısların alıw hám ulıwmalastırıwǵa kelisip aldı.
Bunnan tısqarı, xalıq deputatları jergilikli keńesleriniń Agrar, suw xojalıǵı hám ekologiya máseleleri boyınsha turaqlı komissiyalarınıń aǵzaları ushın oqıw-seminarı da ótkerildi. Onda turaqlı komissiyalardıń jumısın nátiyjeli shólkemlestiriw, olardıń tiykarǵı baǵdarları boyınsha rejelerdi belgilew, wákillikleri sheńberinde áhmiyetli máselelerdi dodalaw hám anıq nátiyjelerge erisiw boyınsha tájiriybe almasıldı.

ÓzA