Qaraqalpaqstan Respublikası Bajıxana basqarmasınıń Kontrabandaǵa qarsı gúresiw bólimi hám Bajıxana auditi sektorınıń xızmetkerleri tárepinen avtomatlastırılǵan málimleme sistemalarında rásmiylestirilgen bajıxana júk deklaraciyaları qadaǵalaw tártibinde qayta úyrenilip, aymaqta jumıs alıp barıp atırǵan juwapkershiligi sheklengen jámiyetlerdiń birewiniń atına Qazaqstan Respublikasınan alıp kelingen “júk tasıwshı samosval” tovarınıń hújjetleri tekserildi.

Nátiyjede, bul júk avtotransport quralın klassifikaciyalawshı sırtqı ekonomikalıq jumıs tovarlar nomenklaturası (SEJ TN) boyınsha tovar kodı gúman oyatıp, basqarmanıń SEJ TN tariflik emes tártipke salıw strukturası tárepinen ekspertizadan ótkerildi.
Gúman etilgenindey, kórip shıǵılıp atırǵan transport quralı úlken kólemdegi júklerdi tasıwǵa mólsherlengen avtotransport quralı bolıp, onıń SEJ TN boyınsha klassifikaciya kodları hújjetlerde kórsetilgeninen ózgeshe ekenligi tastıyıqlandı. Nátiyjede, bul JShJǵa 1 mlrd. 493 mln. sum muǵdarında qosımsha bajıxana tólemleri esaplanıp, mámleketlik byudjetke óndiriliwi támiyinlendi.
Qaraqalpaqstanlı bajıxanashılar tárepinen tovar kodlarına baylanıslı anıqlanǵan gezektegi jaǵdayda bolsa, alıp kelingen 2 dana «Pikap» markalı avtotransport quralı hújjetlerde basqa tovar kodı arqalı klassifikaciyalanǵanı ashıp berildi.
Nátiyjede bul avtotransport qurallarına 489 million sum muǵdarında qosımsha bajıxana tólemleri esaplandı.

Qaraqalpaqstan xabar agentligi