Prezident Shavkat Mirziyoev 22-iyul kúni Jizzaq wálayatına barıp, sanaat hám sociallıq tarawda ámelge asırılıp atırǵan jumıslar, qayta islep shıǵarıw quwatlılıqları hám basqa da obektler menen tanıstı.

Mámleketimiz basshısı dáslep “Zamin texnoparki” arnawlı sanaat zonasın barıp kórdi.

Elimizdiń barlıq aymaqlarında ekonomika ushın oǵada kerekli bolǵan kárxanalar qurılmaqta. Bul jańa jumıs orınlarınıń jaratılıwı, sanaat tarmaqlarınıń rawajlanıwı, nátiyjede, xalqımızdıń abadanlıǵı artıwına xızmet etpekte. Jizzaq wálayatında da keyingi jılları qayta islew sanaatınıń kólemi sezilerli dárejede arttı.

“Zamin” texnoparki qurılısın ótken jılı 27-iyunde mámleketimiz basshısı baslap bergen edi. 400 gektarda qurılıp atırǵan texnoparkte qıtaylı investorlar menen birgelikte 1 milliard 200 million dollarlıq 31 joybar ámelge asırıladı.

Ótken dáwirde zárúr infrastruktura hám imaratlar qurıldı. Jaqında birinshi kárxana – “Xinjiang Honglin Tiandi” kompaniyası tárepinen bahası 10 million dollarlıq beton ónimlerin tayarlaw joybarı iske qosıldı. 60 adamnıń bántligi támiyinlendi.

Házirgi kúnlerde 42 million dollarlıq ekinshi joybar boyınsha jumıslar juwmaqlanıw basqıshında. Onda “Midea” brendi astında jılına 300 mıń dana turmıslıq elektr texnikaları islep shıǵarıladı. 150 jumıs ornı jaratıladı.

Mámleketimiz basshısına usı hám gezektegi joybarlar haqqında málimleme berildi.

Birinshi basqıshta arnawlı sanaat zonasına 9 joybar jaylastırılǵan. Búgingi kúnde derlik 300 million dollarlıq jáne 7 joybar boyınsha qurılıs jumısları dawam etpekte. Olarda qurılıs materialları, konstrukciyalar, elektr texnikası hám ximiya ónimleri islep shıǵarıladı, logistika hám trening orayı shólkemlestiriledi.

Ulıwma, sanaat zonasındaǵı barlıq joybarlardıń nátiyjesinde derlik 5 trillion sumlıq sanaat ónimleri islep shıǵarıladı, 15 túrdegi jańa ónim ózlestirilip, 70 million dollarlıq eksport potencialı jaratıladı. Eń áhmiyetlisi, 5 mıńnan aslam puqara jumıslı boladı.

Prezident investorlarǵa járdemlesip, joybarlardı tezlestiriw boyınsha kórsetpeler berdi. Sanaat tarawlarına say qánigeler tayarlaw, jaslardıń bántligin támiyinlew áhmiyetli ekenligin atap ótti.

Mámleketimiz basshısı “Zamin” texnoparkinde rejelestirilgen jańa joybarlardıń prezentaciyası menen tanıstı.

Joqarıda atap ótilgenindey, birinshi basqıshta 9 joybar boyınsha jumıslar baslanǵan. Endi ekinshi basqısh sheńberinde jáne 5 joybar qáliplestirilgen.

Sonıń ishinde, “Longze Investment Group” kompaniyası menen birgelikte qáwipsizlik hám medicina texnikaları, “Foxit” kompaniyası menen noutbuk, planshet, server, router sıyaqlı zamanagóy ónimlerdi islep shıǵarıwdı jolǵa qoyıw mólsherlenbekte. Sonday-aq, bılǵarı hám sport ayaq kiyimleri, qurılıs materialları, shiyshe ıdıslar, ximiya ónimleri boyınsha joybarlar názerde tutılǵan.

Olardıń ulıwma bahası 250 million dollar átirapında bolıp, joqarı qunlı tovarlar islep shıǵarıladı. Tayar ónimlerdiń derlik 70 procenti sırtqı bazarǵa baǵdarlanadı.

Jizzaq wálayatında sırt el investiciyalarınıń muǵdarı jıldan-jılǵa ósip barmaqta. 2018-jılı wálayatta tek ǵana 18 million dollar sırt el investiciyası ózlestirilgen bolsa, ótken jılı bul san 1 milliard dollardan artqan. Keyingi segiz jılda wálayatqa 3,7 milliard dollar investiciya kirgizilgen, 4 mıńnan aslam sanaat kárxanaları iske qosılǵan. Sırt el kapitalınıń qatnasıwındaǵı kárxanalardıń sanı 260 tan artqan.

Bunnan soń Prezident Shavkat Mirziyoev Zamin rayonında qurılıp atırǵan turmıslıq texnika zavodın kózden ótkerdi.

Bul baǵdar boyınsha elimizde úlken potencial bar. Mámleketimiz basshısı bul pátti dawam ettirip, milliy brendler astında jańa ónimler islep shıǵarıw, Ózbekstandı regionallıq “elektrotexnika xabı”na aylandırıw wazıypasın qoyǵan. Zamindegi zavod bunıń bir bólegi boladı.

“Nawayı” arnawlı sanaat parkiniń filialı sıpatında shólkemlestirilgen kompleks 80 gektar maydanda jaylasqan. Joybardıń ulıwma bahası 150 million dollar. Bul jerde kir juwıw mashinası, suwıtqısh, televizor, elektr suw ısıtqısh sıyaqlı 1 million dana turmıslıq texnika hám komplektlewshi bólekler islep shıǵarıladı. 100 túrdegi ónimlerdiń nátiyjesinde lokalizaciyalaw dárejesi 70 procentke jetedi.

Áhmiyetlisi, jıllıq óndiris kólemi 320 million dollardı quraydı. Sonnan 140 million dollarlıq ónim eksportqa baǵdarlanadı. 7 mıńnan aslam xalıq jumıs penen támiyinlenedi.

Sanaat parkinde tayarlanǵan ónimler Ázerbayjan, Qazaqstan, Qırǵızstan, Tájikstan sıyaqlı 15 ten aslam mámleketke eksport etiledi.

Házirgi ózgeriwsheń bazar talaplarına tez beyimlesiw ushın zavodtıń ózinde qálipxana da shólkemlestiriledi. Zamanagóy logistika orayı arqalı ónimler qarıydarǵa izbe-iz jetkerip beriledi.

Bunnan tısqarı, sanaat parkinde “Avtosanaat” AJ quramındaǵı kárxanalar ushın plastmassa ónimlerin tayarlaw da rejelestirilgen.

Mámleketimizdiń barlıq aymaqlarında imkaniyatlardı tolıq iske qosıw ilajları kórilmekte. Ótken jılı 31-dekabrde Jizzaq wálayatın sociallıq-ekonomikalıq rawajlandırıwdı jedellestiriw boyınsha Prezident qararı qabıl etilip, zárúr máseleler sheship berilgen edi. Atap aytqanda, onda 2025-jılı 2 milliard dollar investiciya tartıw, eksporttı 285 million dollarǵa jetkeriw, 168 mıń adamdı jumıs penen támiyinlew ilajları belgilengen edi.

Bul wazıypalar izbe-iz orınlanbaqta. Ótken altı ayda Jizzaqta sanaat, servis hám awıl xojalıǵında 200 joybar iske qosıldı. Wálayatqa 662 million dollar investiciya kirip keldi.

Nátiyjelilikti jáne de arttırıw maqsetinde Jizzaq wálayatı Zamin rayonında da “Reformalar shtabı” dúzilgen.

Mámleketimiz basshısı sapar etiwi dawamında wálayatta ámelge asırılıwı rejelestirilgen jańa joybarlardıń prezentaciyası menen de tanıstı.

Atap aytqanda, “bir ayna” principi tiykarında awıl xojalıǵı xızmetlerin bir jerge jámlegen “Agromarkaz” shólkemlestirildi. Ónimdarlıqtı arttırıwǵa qaratılǵan jańasha qatnaslar wálayatta azıq-awqat ónimleriniń sapasına unamlı tásir etip, xalıqtıń kóbirek dáramat tabıwına imkaniyat jaratpaqta.

Jizzaq wálayatı kartoshka jetistiriwdi rawajlandırıwǵa tiykar etip alınbaqta. Búgingi kúnde Zamin ilimiy tájiriybe stanciyasında sırt el hám jergilikli selekciyaǵa tiyisli 12 sort dáslepki tuqımgershiligi jolǵa qoyıldı.

Ádette tuqımlıq kartoshka jetistiriw 6-7 jıl hám 8 basqıshtı talap etse, jańa usınısqa bola, process 4 basqıshqa qısqartılıp, 2 jılda tayarlanadı. Onda kartoshkanıń jańa selekciya sortlarınan 12 tonna joqarı áwlad super elita tuqımları xalıqtıń shańaraqlarına biypul tarqatıladı. Nátiyjede 120 tonna elita kartoshka tuqımı jetistiriledi. Joybar sheńberinde Zamin hám Baxmal rayonları tuqımlıq kartoshka jetistiriwge qánigelestiriledi.

Sonday-aq, sobıqlı eginler egiw, Zarbdor rayonındaǵı kanalda nasos stanciyaları hám magistral qubırlar qurıw rejeleri belgilengen.

Jizzaqtıń sulıw tábiyatı, tawlı hám shól aymaqları jıldıń tórt máwsiminde de sayaxat etiw imkaniyatın beredi. “Zamin” turistlik-rekreaciyalıq zonası, Zamin aeroportı hám jańa jollar bul imkaniyatlardı jáne de keńeytti. Iri 6 kanaldıń boyında seyil etiw orınları shólkemlestirildi. Endi “Aydar-Arnasay” kóller sisteması jaǵasında da zamanagóy turizm orayı qurıladı.

– Rayonlarǵa sanaattı alıp kirip, adamlardı jumıslı etiwge háreket etip atırmız. Burın dalalıq bolǵan jerlerde zamanagóy kárxanalar payda bolmaqta. Adamlarımız ónerinen, qıytaq jerinen de dáramat tawıp atır. Biraq bul búgingi nátiyje. Jańa áwlad jetisip kiyatır, jaslarımızdıń bilimi, talabı artıp barmaqta. Olardıń islewi, jaqsı jasawı ushın házirden tiykar jaratıwımız kerek. Eger imkaniyatlardan durıs paydalanılsa, Zamin rayonı jumıssızlıqtan awlaq aymaq bola aladı, – dedi Shavkat Mirziyoev.

Bizge belgili, Kwkdala rayonınıń jańa orayında kórkem óner sarayı, kórkem óner mektebi, ulıwma bilim beriw mektebi hám sport kompleksi birgelikte qurılmaqta. Mámleketimiz basshısı bul balalarǵa qolaylı bolatuǵının atap ótip, kelesi joybarlarda usı usıldı qollanıw zárúrligin aytqan edi. Endi usı tájiriybe tiykarında Zamin rayonında da mádeniyat sarayı hám kórkem óner mektebiniń qurılısı rejelestirilgen. Mádeniyat sarayı 300 orınǵa iye bolıp, rayon orayındaǵı 45 mıńnan aslam xalıqqa xızmet kórsetedi. Bul jerde “Zamin sayqalı” folklor-etnografiyalıq jámááti, 13 dógerek jumıs alıp baradı.

Juwapkerlerge bul rejelerdiń orınlanıwı, sociallıq-ekonomikalıq tarawlardıń rawajlanıwı boyınsha tapsırmalar berildi.

Sonıń menen Prezidentimizdiń Jizzaq wálayatına saparı juwmaqlandı.

ÓzA