Prezident Shavkat Mirziyoev 10-iyul kúni Tashkent qalasındaǵı qurılıs jumısları, xalıqtıń turmıs sharayatı, sanaat kárxanalarınıń jumısı menen tanıstı.

Bul retki baǵdar Shayxantohur hám CHilanzar rayonların qamtıp aldı. Olardı Bunyodkor kóshesi baylanıstırıp turadı. Bul oraylıq kóshede kórkem óner hám mádeniyat dárgayları, hár qıylı ofisler, kóp qabatlı turaq jaylar, supermarket hám restoranlar jaylasqan. Bul potencialdan paydalanıp, onıń 1,5 kilometr bólegi xızmet kórsetiw hám gastroturizm kóshesine aylandırıldı.

Mámleketimiz basshısı jámiyetshilik wákilleri menen birge bul jerdegi sharayatlardı kózden ótkerdi. Joldıń boyları abadanlastırılǵan. Ájayıp landshaft dizaynı, fontanlar, hár qıylı shıraqlar aymaqqa jáne de kórik baǵıshlaǵan. Adamlardıń seyil etiwi, awqatlanıwı, mazmunlı dem alıwı ushın barlıq qolaylıqlar jaratılǵan.

Usı maqsette bul jerdegi 90 isbilermenlik subekti kúni-túni jumıs islew tártibine ótkerildi. Sonnan 45 kárxana jańadan shólkemlestirildi. 500 adam jumıs penen támiyinlendi.

Kóshege tutas aymaqtaǵı Kamalon, Jańa Kamolon hám Kamolon dárwaza máhállelerinde 18 mıńǵa shamalas xalıq jasaydı. Bul ózgerisler, bárinen burın, usı insanlardıń turmısında seziledi. Sonıń menen birge, házir bul jerge jılına 255 mıń miyman kelmekte. Endi olardıń sanın jılına 1 millionǵa jetkeriw ushın sharayat bar.

Keyingi jılları elimizde turizm tarawında 2 mıńnan aslam jańa isbilermen jumıs basladı. Ótken jılı sırt elli turistlerdiń keliwi birinshi márte 10 millionnan astı. Aymaqlarda sayaxat hám servis infrastrukturası jaqsı rawajlanbaqta. Turizm awılları, miyman úyleri, gastronomiyalıq kósheler qollap-quwatlanbaqta.

Paytaxtımızdıń Mirabad, Almazar, CHilanzar, Yakkasaray, Yangihayot rayonlarında usınday háreketli kósheler shólkemlestirilgen. Bunyodkor kóshesi usı turizm aylanbasınıń bir bólegi boladı. Ulıwma, Tashkent qalasında 26 kósheni kúni-túni isleytuǵın háreketli kóshege aylandırıw, 24 saat isleytuǵın sawda orınların mıńǵa kóbeytiw rejelestirilgen.

Bul jerde zamanagóy bándirgiler hám avtomobil turatuǵın orınlardıń prezentaciyası bolıp ótti.

Mámleketimiz basshısı Shayxantohur rayonındaǵı Yangi Kamolon máhállesinde boldı.

Mámleketimizdegi reformalardıń “nápesi” hár bir aymaqqa kirip barmaqta. Xalıqtıń bántligi hám turmıs mádeniyatına qaratılıp atırǵan itibar bul máhállede de kózge taslanadı. Kóp qabatlı turaq jaylar, dúkanlar, puqaralar jıyını imaratı zamanagóy kóriniske iye. Ishki jollar tegislenip, átirapı kóklemzarlastırılǵan. Sulıw seyil etiw ornı hám piyadalar jolı, nuraniylar dem alatuǵın orın, sport hám balalar maydanshaları qurılǵan.

Jańa Kamolon máhállesinde 4 mıń 600 den aslam xalıq jasaydı. 60 tan aslam sawda hám xızmet kórsetiw shaqapshalarında máhálle jasları jumıs penen bánt. Bıyıl ónermentler dárgayı, atız ónimleri hám konditerlik dúkanları, nanbayxana shólkemlestirildi, jeke menshik medicina punkti ashıldı. Nátiyjede máhálle jumıssızlıqtan jıraq aymaqqa aylandı.

Usı jerde Shayxantohur rayonı “Reformalar shtabı”nıń jumısı haqqında málimleme berildi.

– Shayxantohurda ónermentshilik ázelden bar. Búgin de rayonda adamlardı jumıs penen, dáramat penen támiyinlewde bul úlken dárek. Sonıń ushın Shayxantohur mısalında xızmetler tarawın rawajlandırıw boyınsha jańa ilajlar rejesin qabıl etemiz, – dedi Shavkat Mirziyoev.

Xalıqtıń qáwipsizligin támiyinlew, jınayatlardıń aldın alıw maqsetinde máhálle inspektorınıń bólmesinde situaciyalıq oray shólkemlestirilgen. Oǵan kóp qabatlı turaq jaylardıń koridorlarındaǵı baqlaw kameraları hám ishki isler sistemasınıń qáwipsizlik baǵdarlamaları baylanısqan. Bıyıl máhállede birde-bir jınayat júz bermegen.

“Yangi Kamolon” basqarıw servis kompaniyası máhálledegi 21 kóp qabatlı jayǵa xızmet kórsetedi. Ustalar hám arnawlı texnikalar bárqulla tayar jaǵdayda. Esap-sanaqlarda billing sisteması jolǵa qoyılǵan. Bıyıl oraylıq ıssılıq qubırları izolyaciyalandı, elektr tarmaqları hám turaq jaylardıń jolları ońlandı. Ayırım jaylarǵa jańa liftler ornatıldı.

Mámleketimiz basshısı keleshekte basqarıw servis kompaniyasınıń imaratların kóp qabatlı etip qurıp, jaslar ushın kásip-óner oqıwları, turmıslıq xızmet shaqapshaların jaylastırıw boyınsha kórsetpe berdi. Bul jerdegidey kishi kitapxanalardı basqa máhállelerde de shólkemlestiriw áhmiyetli ekenligi atap ótildi.

Máhálle imaratında xalıq penen qızǵın sáwbet boldı.

– Keyingi jılları kóp kárxanalar ashıldı, ekonomika óspekte. Sonıń menen birge, jaslarımız da jetisip kiyatır. Olardıń tálim-tárbiyası, densawlıǵı, jumıs orınların házirden oylawımız kerek. Sonıń ushın bıyıl Tashkent qalasına 8 milliard dollar investiciya alıp kelmektemiz. Sonıń esabınan Shayxantohurda da jańadan-jańa jumıs orınları, bilimlendiriw dárgayları, infrastruktura imaratları jaratıladı, – dedi Prezident.

Nuraniy ata hám analar elimizdegi ózgerislerden quwanıshlı ekenin atap ótip, xalqımızǵa tınıshlıq-abadanlıq tilep pátiya etti.

Bunnan soń Prezident Shavkat Mirziyoev rayondaǵı “Insan” sociallıq xızmetler orayına bardı.

Mámleketimizde sociallıq mámleket, sociallıq ádillik principleri ústin. Usı qádiriyatlar tiykarında barlıq aymaqlarda “Insan” orayları ashılıp, mehir hám járdem sisteması xalıqqa jaqınlastırılmaqta.

Orayda 12 kategoriyadaǵı mútáj insanlarǵa 100 den aslam sociallıq xızmetler kórsetiledi. Onıń ushın mákemede zamanagóy sharayatlar jaratılǵan. Múrájatlardı qabıl etiw, talaptı bahalaw, xızmetti belgilew hám xızmet kórsetiw processleri adamlarǵa qolaylı tárizde jolǵa qoyılǵan.

Eń áhmiyetlisi, endi wazıypa bir márte járdem menen tamamlanbaydı. Sociallıq xızmetten paydalanıwshınıń keyingi jaǵdayı, ózin-ózi durıslawı da monitoring etip barıladı. Bul barlıq processler sanlastırılǵan hám tiyisli shólkemler menen baylanısqan.

Shayxantohurdaǵı orayda 25 qánige hám máhállelerde 51 sociallıq xızmetker jumıs alıp barmaqta. Mayıplıǵı bolǵan balalar hám shaxslar, jalǵız kekseler menen mánzilli túrde jumıs alıp barılmaqta.

– Bul jer hár bir insannıń dárti menen jasaytuǵın, olardı razı etetuǵın dárgay. Bul sistema arqalı jámiyetimizde sociallıq ádillik, insan qádirli boladı, – dedi Prezidentimiz.

Bul jerde mámleketlik-jeke menshik sheriklik tiykarında “Imkaniyatlar dúnyası” mákemesi shólkemlestirilgen. Mámleketimiz basshısı ondaǵı sharayatlardı da kózden ótkerdi.

Mákemede 3 jasqa shekemgi náresteler ushın erte aralasıw, mayıplıǵı bolǵan balalar ushın sociallıq beyimlesiw hám reabilitaciya, sonday-aq, kúndizgi tárbiyalaw hám qaraw xızmetleri shólkemlestirilgen. Házirgi waqıtta bul 80 ge shamalas adamnıń awırın jeńil etpekte. Olarǵa 12 maman xızmetker mehir-itibar kórsetpekte.

Soń Prezident Shavkat Mirziyoev CHilanzar rayonındaǵı sanaat aymaǵında ámelge asırılıp atırǵan joybarlar menen tanıstı.

Bul aymaq Besqorǵan hám Tirsakabad máhálleleri aymaǵında jaylasqan bolıp, 320 gektar maydandı iyelegen. Kishi sanaat zonası statusındaǵı bul kompleks Prezidenttiń 2023-jıl 3-iyuldegi qararı tiykarında shólkemlestirilgen. Oǵan muwapıq, transport, injenerlik-kommunikaciya hám jol infrastrukturasınıń jaqsılanǵanı sanaat hám isbilermenliktiń rawajlanıwına tiykar jarattı.

Bul jerde xalıqaralıq standartlarǵa muwapıq energiya únemlewshi, ekologiyalıq qáwipsiz óndirislik quwatlıqlar qurıldı. Házirgi kúnde bunday kárxanalardıń sanı 531 ge jetti. Olarda jaratılǵan jumıs orınlarınıń sanı bolsa 20 mıńǵa shamalastı. Jıllıq óndirislik potencial da az emes – 6 trillion 800 million sum. Bıyılǵı jılı aymaqtaǵı 50 kárxanada 180 million dollarlıq ónim eksport etiledi. Burın CHilanzarda hesh qashan bunday kórsetkishler bolmaǵan.

Mámleketimiz basshısı usı aymaqtaǵı “Tarleplast”kárxanasında bolıp, óndiris procesin kózden ótkerdi.

Bul joybardıń ulıwma bahası 25 million dollar. Kárxanaǵa Evropanıń jetekshi kompaniyalarınan 12 túrdegi zamanagóy úskeneler alıp kelinip ornatılǵan. Nátiyjede bul jerde jılına 90 mıń tonna temir qubır hám polat profiller islep shıǵarıw imkaniyatı jaratıldı. Bul ónimlerdi pulǵa esaplaǵanda 900 milliard sum degeni. Kárxanada 120 ǵa shamalas adam turaqlı jumıs penen támiyinlendi.

Áhmiyetlisi, joqarı basımǵa hám sırtqı tásirlerge shıdamlı qubırlar túri, kólemi hám bahası boyınsha básekige shıdamlı. Bunıń dálilin ótken jılı 4 million dollarlıq ónim Rossiya, Qazaqstan, Tájikstan hám Qırǵızstan sıyaqlı mámleketlerge eksport etilgende de kóriw múmkin. Endi satıw geografiyasın jáne de keńeytiw mólsherlenbekte.

Mámleketimiz basshısı usı industrial aymaqta islep shıǵarılıp atırǵan ónimlerdiń kórgizbesin kózden ótkerdi. Jaqın keleshektegi sanaat joybarları tanıstırıldı.

Sonıń ishinde, kóp qabatlı óndirislik imarat hám monooray shólkemlestiriliwi názerde tutılǵan. Bunıń nátiyjesinde aymaqta jáne 100 jańa joybar ámelge asırıladı, qosımsha 3 mıń jumıs ornı jaratıladı. Joybarlar qurılıs, farmacevtika, elektrotexnika, poligrafiya, avtomobil qurılısı, tigiw-trikotaj hám konditerlik sıyaqlı baǵdarlardı qamtıp alǵan.

Prezidentimiz isbilermenler menen sáwbetlesti. Qosımsha qunlı ónimler tayarlaw, jumıs orınların kóbeytiw hám xızmetlerdi rawajlandırıw boyınsha kórsetpeler berildi.

Prezident Shavkat Mirziyoev rayondaǵı industriallıq aymaqta jaylasqan “Eman materials” kárxanasında da boldı.

Búgin dúnyadaǵı ekonomikalıq ózgerisler sharayatında, bárinen burın, ishki imkaniyatlardan paydalanıw, eń kóp jumıs ornın jaratatuǵın tarawlardı qorǵaw zárúrligi tuwılmaqta. Elimizde toqımashılıq, qurılıs materialları, mebel islep shıǵarıw áne usınday tarawlardıń qatarına kiredi. Olarda bir millionǵa shamalas xalıq jumıs islemekte.

Sonıń ishinde, mebel qurılısına qánigelesken 7 mıń 500 kárxana jumıs alıp barmaqta. Ótken jıldıń ózinde 920 jańa kárxana ashılǵan. Tarawda 6 trillion 700 milliard sumlıq ónim tayarlanıp, 20 million dollarlıq mebel eksport etilgen.

Xorezm wálayatınıń Xanqa rayonı tájiriybesi tiykarında basqa jerlerde de mebel islep shıǵarıw orayları shólkemlestirilmekte. Tarawdaǵı isbilermenlerdiń sırt elden shiyki zat, furnitura hám aksessuar alıp keliwi, eksport bazarlarına shıǵıwı mámleket tárepinen qollap-quwatlanbaqta.

CHilanzar rayonındaǵı industriallıq aymaqta mebel islep shıǵarıwǵa qánigelesken onlaǵan shirket bar. “Eman materials” kárxanası intakerdiń 10 million dollar qarjısı esabınan shólkemlestirilgen. Bul jerde jılına 10 mıń tonna furnitura hám mebel qurılısı buyımları islep shıǵarılmaqta. Olar kooperaciya tiykarında elimizdegi mıńlaǵan kárxanalarǵa jetkerip berilmekte. Endi eksportqa shıǵarıw da rejelestirilgen.

Kárxanada 200 adam jumıs penen támiyinlengen. Áhmiyetlisi, usı jerdiń ózinde mebel qurılısı oqıw orayı da shólkemlestirilgen. Bunıń ushın Italiya hám Túrkiya sıyaqlı mámleketlerden qánigeler tartılǵan.

Sonday-aq, kárxana tárepinen buyırtpa tiykarında mebel islep shıǵarıw, joybarlaw, kesiw, úskenelerdi ońlaw sıyaqlı qosımsha xızmetler de kórsetiledi.

Komplekste kórgizbe zalı da shólkemlestirilgen bolıp, bul jerde paytaxttaǵı belgili – brend ónimler bir jerge jámlengen. Bul sistema satıwshı, xızmet kórsetiwshi hám alıwshıǵa qolaylıq jaratpaqta.

Mámleketimiz basshısı kárxanadaǵı jumıs procesin kózden ótkerip, qánigeler menen sáwbetlesti. Mebel qurılısı tarmaǵında lokalizaciyalaw hám qosımsha qun jaratıw boyınsha ele paydalanılmaǵan oǵada kóp imkaniyat bar ekenligi kórsetip ótildi.

Usı jerde CHilanzar rayonında shólkemlestirilgen “Reformalar shtabı”nıń jumısı haqqında málimleme berildi. Xalıqtıń bántligin támiyinlew, kámbaǵallıqtı qısqartıwǵa qaratılǵan jańa usınıslar hám kútilip atırǵan nátiyjeler kórip shıǵıldı.

Atap ótiliwinshe, rayonda usı jıldıń basında kámbaǵallıq dárejesi 7 procentten joqarı bolǵan bolsa, birinshi yarım jıllıqtıń juwmaqları boyınsha bul san 2,2 procentke túsken. Mánzilli reje boyınsha, rayondı jıldıń aqırına shekem kámbaǵallıq  hám jumıssızlıqtan jıraq aymaqqa aylandırıw maqset etilgen. Bunıń ushın shańaraqlardıń imkaniyatın júzege shıǵarıw, mikrojoybarlardı ámelge asırıw, jańa isbilermenlik subektlerin shólkemlestiriw, rásmiy emes jumıs orınların nızamlastırıw ilajları kóriledi.

Prezident xalıqtıń bántligine qaratılǵan baslamalardı bárqulla qollap-quwatlaytuǵının bildirdi. Investiciyalardı tartıp, imkaniyatlardı joybarǵa aylandırıw, kishi kárxanalardıń jumısın keńeytiw zárúrligin atap ótti. Ekonomika hám investiciya tarawlarınıń juwapkerlerine isbilermenler menen turaqlı ushırasıp, mashqalaların sheshiw, usınısların júzege shıǵarıw boyınsha tapsırmalar berildi.

 

Ziyodulla Jánibekov,

Ikrom Avvalbaev,

ÓzAnıń xabarshıları