Nókis rayonında medicina tarawın sanlastırıw baǵdarında bir qatar jumıslar alıp barılmaqta. Atap aytqanda rayondaǵı medicina birlespesinde «Elektron poliklinika» hám «Elektron emlewxana» málimleme sistemaları jetilistirilip, «Birden bir medicina sisteması» jaratıldı.

Sistemanıń engiziliwi esabınan, aldın nawqas shıpaker qabıllawında 40 minut kútken bolsa, shıpakerge onlayn jazılıw arqalı kútiw waqtı 10 minutqa tústi hám Dmed mobil platforması arqalı úyde otırǵan halda shıpaker qabıllawına gezekke  jazılıwına boladı.

Nawqaslardıń poliklinikaǵa keliwi nátiyjesinde toplanatuǵın medicinalıq maǵlıwmatlardı elektron túrde saqlaw imkaniyatı jaratıldı. Yaǵnıy tapsırǵan analizleriniń juwmaǵın nawqas elektron programma arqalı alıw imkaniyatına iye.

Sistema Mámleketlik personallastırıw orayı, MIS-2 hám Elektron húkimet platformaları menen integraciyalandı. Puqaranıń  júzin anıqlaw baǵdarlamaları arqalı dárhal xızmet kórsetiw rejimine ótilip, qálegen medicina mákemelerinde nawqas haqqındaǵı medicinalıq maǵlıwmatlar real waqıt rejiminde alıw imkaniyatı jaratıldı.

Elimizdegi medicina tarawında jaratılıp atırǵan bul zamanagóy imkaniyatlar artıqsha áweregershilikti azaytıwǵa tiykar boları anıq.

Qaraqalpaqstan xabar agentligi