Usı jıl 8-iyul kúninen baslap Ájiniyaz atındaǵı Nókis mámleketlik pedagogikalıq institutında 2025-2026-oqıw jılı ushın qabıllaw procesinde bakalavriattıń ayrıqsha qábilet talap etiletuǵın tálim baǵdarlarında kásiplik (dóretiwshilik) imtixanlar baslandı.

Dene mádeniyatı, muzıkalıq tálim, súwretlew óneri hám injenerlik grafikası tálim baǵdarları boyınsha ótkerilip atırǵan imtixanlardıń belgilengen talaplar tiykarında ádil hám ashıq-aydın ótiwi deputatlar, jámiyetlik shólkemler,  siyasiy partiyalar, ǵalaba xabar quralları, sonıń menen birge, tiyisli ministrlik hám shólkemlerden biriktirilgen wákiller tárepinen qadaǵalanbaqta.

Imtixanlardıń barısı internet tarmaǵı arqalı ata-analar hám keń jámiyetshilik wákillerine tikkeley alıp kórsetilmekte.

Abiturientlerdiń bilim hám kónlikpelerin bahalaw ushın Ózbekstannıń túrli oqıw orınlarınan, atap aytqanda, Ózbekstan milliy pedagogikalıq universiteti, Jizzaq hám Shırshıq mámleketlik pedagogikalıq universitetleri, sonday-aq, Úrgensh, Buxara, hám Termiz mámleketlik pedagogikalıq institutlarınan tájiriybeli professor-oqıtıwshılar jáne qánigeler biriktirilgen bolıp, olar tárepinen hár bir abiturienttiń tayarlıǵı ádil túrde bahalanıp, toplaǵan balları sol waqıttıń ózinde málim etilmekte.

– Búgin aqlıǵım instituttıń dene mádeniyatı tálim baǵdarına ámeliy imtixan tapsırıp atır. Ózim usı instituttı pitkerip, muǵallim bolıp isledim. Mine, búgin institutqa kelip, bul jerdegi ózgerislerdi, jaratılǵan sharayatlardı kórip kewlim toldı. Imtixan processleri qalay ótip atırǵanın ashıq-aydın tikkeley baqlap otırmız,– deydi Shımbay rayonınan kelgen M.Baltabaeva.

Maǵlıwmat ushın, bıyılǵı jılı Nókis mámleketlik pedagogikalıq institutında bakalavriattıń dene mádeniyatı, muzıkalıq tálim, súwretlew óneri hám injenerlik grafikası tálim baǵdarları boyınsha 500 den aslam abiturientler kásiplik (dóretiwshilik) imtixanların tapsırıwı kútilmekte.

Institutta kásiplik (dóretiwshilik) imtixanlar usı jıldıń 11-iyul kúnine shekem dawam etedi.

Qaraqalpaqstan xabar agentligi.