Qarar hám onıń orınlanıwı

 Ózbekstan Respublikası Prezidenti hám Ministrler Kabinetiniń arnawlı párman hám qararlarına muwapıq, búgingi kúnde respublikamızda keń kólemli qurılıs-abadanlastırıw jumısları ámelge asırılmaqta. Sonıń ishinde, qala hám rayonlardaǵı ulıwma bilim beriw mekteplerinde de bul baǵdarda ámelge asırılıp atırǵan jumıslar qızǵın dawam etpekte.

Nókis qalasındaǵı Qumbız mákan puqaralar jıyınında jaylasqan 26-sanlı ulıwma orta bilim beriw mektebi 535 orınǵa mólsherlengen bolıp, házirgi kúnde onda 858 oqıwshı bilim almaqta. 2024-2025-oqıw jılı juwmaǵı menen usı mektepte 37 klass bolıp, ulıwma 86 pedagog xızmetker oqıwshılarǵa bilim sırların úyretti.

–        Elimiz boylap ámelge asırılıp atırǵan keń kólemli qurılıs, abadanlastırıw ilajlarınıń bir bólegi ótken jılı mektebimizde de ámelge asırılıp, sol jılı mart ayında “Baslamalı byudjet” tańlawında 1 milliard 200 million sumlıq joybarımız benen jeńimpaz boldıq. Usı qarjılarǵa mekteptiń janınan voleybol, kishi futbol, basketbol hám balalar shınıǵıw maydanshası qurıldı,-deydi mektep direktorı Perixan Palwanova. – Bul obektler ótken 2024-2025-oqıw jılı aldınan paydalanıwǵa tapsırıldı.

Mekteptegi qurılıs, abadanlastırıw jumısları bunıń menen toqtap qalǵan joq. Aymaq turǵınlarınıń talabı menen mektebimizdiń kóshe tárepindegi zabor buzılıp, kósheniń shetinen piyadalar jolı tóseldi. Endi taraw basshıları, hákimlik penen oylasıp, zabordı ishkerirekten qaytadan qurıw, átirapın abadanlastırıw boyınsha jumıslardı baslawdı rejelestirip atırmız.

Jaqında, yaǵnıy usı jıldıń may ayında mektebimizde oqıwshılardıń belgilengen muǵdardan kóp ekenligi, klass bólmeleriniń jetispewshiligi sebepli, onıń tiykarǵı imaratına qosımsha túrde ulıwma maydanı 15548,2 kvadrat metrlik, 3 qabatlı, 330 orınlıq jańa imarattı qurıw boyınsha jumıslar baslandı. Bul imaratqa buyırtpashı “INFRATUZILMANI RIVOJLANTIRISH INJINIRING KOMPANIYASI” mámleketlik kárxanası bolıp, qurılıs jumısları jumıstı bólip alıp islewshi kárxana  “Amudaryo maxsus qurulish” JShJ tárepinen ámelge asırılmaqta. Obekttiń ulıwma smetalıq bahası 3 milliard 782 million 996 mıń sumdı quraydı.

Házirgi waqıtta imarattıń birinshi qabatı tolıq órilip, beton jumısları alıp barılmaqta. Bul imarat tolıq túrde usı jıldıń avgust ayında pitkeriliwi rejelestirilgen.

Álbette, mekteplerde jaratılıp atırǵan usınday sharayatlar muǵallimler ushın da, oqıwshılar ushın da keń múmkinshilikler esigin ashıp beredi.

Usı jerde 2024-2025-oqıw jılında mektebimiz oqıwshıları muǵallimleriniń bergen bilimleriniń arqasında bir qatar jetiskenliklerge eriskenin atap ótkim keledi.

Bul oqıw jılında mektebimiz PISA-2025 xalıqaralıq tańlawına kirip, oǵan mektebimizden 15 jastaǵı oqıwshılarımız belsene qatnastı. Usı jıl 9-aprel kúni 15 jastaǵı oqıwshılar arasında Ɵzbekstan Respublikası Mektepke shekemgi hám mektep bilimlendiriwi ministrligi tárepinen ótkerilgen “Bilimdan oqıwshılar” tańlawınıń 1- 2-baqıshına qatnasıp, oqıwshılarımız joqarı kórsetkishlerge eristi. Oqıwshılarımız ótkerilip atırǵan hár qıylı pán olimpiadaları menen tańlawlarda da  jeńimpazlar qatarınan orın almaqta.

Álbette, Prezidentimiz hám Húkimetimiz tárepinen jaratılıp atırǵan sharayatlar, muǵallimlerimizdiń pidákerlik miynetleri jetiskenliklerimizdi ele de kóbeyte beredi, dep isenemiz.

Á.Jiyemuratov,

Qaraqalpaqstan xabar agentligi.