Házirgi waqıtta gaz támiynatı tarawı qánigeleri barlıq dıkkat-itibardı gúzgi-qısqı máwsimge tayarlıq jumıslarına qaratpaqta.

Respublikamızdıń barlıq qala hám rayonlarındaǵı gaz támiynatı bólimleri hám filialdıń Qurılıs-montajlaw basqarması qánigeleri gaz tarmaqların rekonstrukciyalaw, iri ońlaw hám jer astı gaz tarmaqların jer ústine shıǵarıw jumısların belgilep alınǵan reje tiykarında alıp barmaqta.

Nókis rayonı Uzıkól mákan puqaralar jıyınındaǵı Aqmanǵıt gúzarı kóshesi boyında jaylasqan 1,2 kilometrlik uzınlıqtaǵı d-273 mm.lik jer astı gaz tarmaqların jer ústine shıǵarıw jumısların alıp barmaqta.

Sonday-aq, rayondaǵı gaz tarmaqların 2025-2026-jılǵı gúzgi-qısqı máwsimge tayarlaw boyınsha 4,1 kilometrlik gaz tarmaqların rekonsturkciyalaw, 138 gaz bólistiriw punktlerin tekseriw, reviziyalaw, 60 kilometrlik gaz tarmaqların hawa basımı astında sınaw hám tazalaw, 15,3 kilometrlik jer astı gaz tarmaqlarınıń jaǵdayın tekseriw hám 30 kilometrlik gaz tarmaqların boyaw jumısların alıp barıw rejelestirilgen.

Bul alıp barılıp atırǵan gúzgi-qısqı máwsimge tayarlıq jumıslarınan soń rayondaǵı 3160 xojalıqtıń gaz támiynatı jaqsılanıwı názerde tutılǵan.

Á.Jiyemuratov,

Qaraqalpaqstan xabar agentligi.