Ózbekstan Respublikası Ministrler Kabinetiniń 2025-jıl 27-maydaǵı 331-sanlı qararı Qaraqalpaqstan Respublikasında gúnji hám másh eginlerin jetistiriw sistemasın jetilistiriwde áhmiyetli orın tutpaqta,-dep xabar bermekte Awıl xojalıǵı ministrliginiń baspasóz xızmeti.

Atap aytqanda, Xojeli rayonındaǵı Sarıshúńgil awıl puqaralar jıyını aymaǵında jaylasqan “Kiyik mergen” fermer xojalıǵı usı qarar tiykarında 60 gektar maydanǵa másh egip, jeńilletilgen túrde 6 ay múddet penen 265 million sumlıq kredit aldı.

Fermer Tursınbay Xudaybergenovtıń atap ótiwinshe, aldın bunday jeńilletilgen sharayatlar bolmaǵan. Ministrler Kabinetiniń bul qararı Qaraqalpaqstanlı fermerler ushın áhmiyetli quwanıshlı xabar boldı. Fermer Prezidentimizge óziniń minnetdarshılıǵın bildirdi.

Bul qarar Qaraqalpaqstanlı fermerler ushın jańa imkaniyatlar jaratıp, gúnji hám másh sıyaqlı awıl xojalıǵı eginlerin jetistiriwdi xoshametleydi.

Maǵlıwmat ushın, Ózbekstan Respublikası Prezidentiniń 2021-jıl 15-dekabrdegi PQ-52-sanlı qararına muwapıq, fermer, diyqan xojalıqları hám basqa da ónim jetistiriwshilerge – miywe, júzim, ovoщ, kartoshka, palız eginleri, gúl, kók shóp hám dárilik ósimlikler, mákke dáni, sobıqlı, maylı hám salı eginlerin jetistiriw ushın ónim bahasınıń 50 procentine shekem jıllıq 14 procent (sonnan 2 procenti bank marjası) stavkada 6 aylıq jeńilletilgen dáwir menen 12 ay múddetke kreditler ajıratıladı.

Ózbekstan Respublikası Prezidentiniń 2025-jıl 10-yanvardaǵı PP-10-sanlı pármanında usı kreditler Qaraqalpaqstan Respublikasında ayrıqsha túrde gúnji hám másh jetistiriw ushın qamsızlandırıw támiynatı menen girewsiz ajıratılıwı belgilengen.

Ózbekstan Respublikası Ministrler Kabinetiniń 2025-jıl 27-maydaǵı 331-sanlı qararına muwapıq gúnji hám másh eginlerin jetistiriwde “Agroplatforma” málimleme sisteması arqalı jeńilletilgen kreditlerdi ajıratıwda topıraqtıń bir bonitet ballına salıstırǵanda normativlik ónimdarlıq gektarına 0,27 centnerdi qurap, Ózbekstan Respublikası Awıl xojalıǵı ministrligi tárepinen járiyalanatuǵın gúnji hám másh egininiń usınıs etilgen satıw bahaları jeńilletilgen kreditlerdi ajıratıwda zúráát bahası sıpatında qabıl etiledi.

Á.Jiyemuratov,

Qaraqalpaqstan xabar agentligi.