Temir jol gúzarı mákan puqaralar jıyını Shımbay qalasınıń arqa shıǵıs tárepinde jaylasqan elat bolıp, aymaq xalqı tiykarınan ónermentshilik hám diyqanshılıq penen shuǵıllanadı. 11,3 gektar úy aldı qıytaq jer maydanlarına iye bul jıyın aymaǵında baǵshılıq, temirshilik, gúlálshılıq hám aǵash ustashılıǵı menen shuǵıllanıwshılardıń sanı jıldan-jılǵa kóbeyip barmaqta.

Solardıń biri Reyim Erejepov.11 sotıx qıytaq jerine miywe hám júzim nálleriniń hár qıylı túrlerin ekken ol, óziniń órnekli isi menen kópshilikke úlgi bolıp júr.

-Burın kóp jıllar dawamında mektepte fizika páni muǵallimi bolıp jumıs isledim,-deydi ol. Fizika ilimi de tábiyatqa baylanıslı ilim bolǵanı ushın men tábiyǵıy qubılıslardı kóbirek baqlap, ósimliklerdiń ósiwi hám onıń rawajlanıwına itibar qaratıp, bul boyınsha ózimshe tájiriybeler júrgizemen. Men bul jerge 2017-jılı jańadan jay salıp kóship keldim. Bul jer burınları egislikten shıǵıp qalǵan, partaw jer edi. Adam qolı gúl degenindey, muǵallimshilikten pensiyaǵa shıqqannan soń, úy aldı qıytaq jerlerimdi egislikke aylandırıp, oǵan alma, almurt, júzim, qáreli, erik, shabdal hám júzim nállerin egip, terek aralarında ovoщ-palız ónimlerin jetistirip kelmektemen. Házirshe qıytaq jerden mol dáramat tappasaqta, ul-qızlarım, aqlıqlarım hám aǵayin-tuwǵanlarıma tábiyǵıy taza miywe-jemisler jegizip atırman. Qońsı-qońsıdan tálim aladı degenindey, qońsılarım da meniń menen tájiriybe almasıp, ózleriniń qıytaq jerlerinen nátiyjeli paydalanıp kelmekte.

-Burın bul aymaqta «Shunaq awılı» degen awıl bolǵan,-deydi usı kóshe turǵını Turǵanbay Erejepov.-Burınǵı awqam tarqaǵannan soń bul jerler egislikten shıǵıp, rayon turǵınlarınıń turaq jay salıwı ushın planǵa berilip ketti. Bizlerde usı jerden plan alıp, tazadan jay qurıp aldıq. 2001-jılı Nókis mámleketlik pedagogikalıq institutın oqıp tamamlaǵannan soń, 2016-jılǵa shekem mektep hám kolledjlerde muǵallim bolıp jumıs isledim. Sońınan temirshilik hám aǵash ustashılıǵı menen shuǵıllanıp kettim. Ázelden diyqanshılıq ata kásip bolǵannan soń, úy aldına hár qıylı miywe nállerin egip, onnan mol jemis alıp kelmektemiz. Sonıń menen birge, zaman talabınan kelip shıǵıp, úy aldına jasalma háwiz qazdım hám onda balıq órshitip atırman. Temirshilikke de uqıbımız bolǵanlıqtan, qolımız bosasa, restoran hám kafeler ushın temir hám rutennen hár qıylı stol hám stulщikler soǵıp, xalıqqa xızmet kórsetip atırmız. Házir biziń islep shıǵarǵan ónimlerimizge rayonımızdan tısqarı, Bozataw hám Qaraózek rayonlarınan da talap kúshli.

-Jıyın aymaǵında ónermentshilik jedel rawajlanıp, jaslar  arasında milliy ónerlerimizdi  keńnen úgit-násiyatlap, olardı keleshek áwladlarımızǵa da úyretip barıwǵa da itibar qaratıp atırmız,-deydi Temir jol mákan puqaralar jıyını baslıǵı Rustem Qazaqbaev.-Azamat Turekeev qara úy soǵıw boyınsha jaslarǵa tálim berip kiyatırǵan bolsa, Qoshqarbay Dáwletov tandır soǵıw sırların úyretip kelmekte.

-1986-jılı ustazım Sársenbay aǵa Yusupovqa shákirt túsip, 1992-jılǵa shekem gúlálshılıqtıń álwan túrli sırların úyrendim,-deydi ataqlı usta Qoshqarbay Dáwletov.-Mine sonnan berli, xalıqqa xızmet kórsetip kiyatırman. Ayına ortasha 250-300 tandır soǵıp, shańaraǵımızdı ózimizdiń hadal mańlay terimiz benen baǵıp atırmız. Ílay jumısınıń ózine jarasa mashaqatı bolǵanlıǵı sebepli, házirgi jaslar bul islerge onsha qol ura bermeydi. Biraq, aymaǵımızda bul ónerge qızıǵıwshılar da barshılıq. Házirgi kúnge shekem 30 dan aslam jigitler maǵan shákirt túsip, tandır soǵıwdı úyrenip ketti. Áyne kúnleri bolsa,  úyde 3 jastı tárbiyalap, olarǵa tandır soǵıw sırların úyretip atırman.

Shınında da miynet-túbi ráhát degenindey, jıyın turǵınları zaman talabınan kelip shıǵıp, xalıqqa sapalı xızmet kórsetip kelmekte. Bunda olarǵa óz perzentleri menen birge, ómirlik joldasları da qolqanat bolıp, xalıqtıń abadan turmısta jasawı ushın biyminnet xızmet etpekte.

Adilbay Orazov,

Qaraqalpaqstan xabar agentligi sholıwshısı.