Mámleketimizde kishi hám orta biznesti rawajlandırıw boyınsha alıp barılıp atırǵan ilajlar, isbilermenlerge jaratılǵan imkaniyatlar nátiyjesinde jaqsı nátiyjelerge erisilmekte. Prezidentimiz tárepinen isbilermenlerdi qollap-quwatlaw boyınsha qabıl etilgen qarar hám pármanlar tiykarında jumıs alıp barıp atırǵan isbilermenlerdiń jetisken tabısların kórip kózimiz quwanadı. Eń tiykarǵısı olar xalqımızǵa xızmet etip, alǵısın almaqta.

Taqıyatas rayonında jumıs alıp barıp atırǵan qapı islep shıǵarıw kompleksinde  tórt isbilermen jumıs alıp barmaqta. Solardıń biri «Xoja naǵısları» juwapkershiligi sheklengen jámiyeti xalqımızǵa ishki qapı hám sırtqı temir qapılar menen temir dárwazalardı islep shıǵarmaqta.

-Bankten jeńilletilgen kredit alıp jumıs baslaǵanımızǵa altı jıl boldı. On adam jumıs penen támiyinlengen. Tiykarınan buyırtpa boyınsha qapı islep shıǵaramız. Sonday-aq, bazardaǵı sawda orınlarına da ónimlerimizdi shıǵaramız. Hár qıylı usıldaǵı qapılardı islep shıǵarıp atırǵan bolsaq, sońǵı  modadaǵı xaytek formasındaǵı qapılarǵa xalıqtıń qızıǵıwshılıǵı kúshli bolmaqta. Elimizde isbilermenlerge jaratılıp atırǵan imkaniyatlardan kewlimiz toq. Bul jeńillikler bizlerge jumıslarımızdıń jáne de rawajlanıwına imkaniyatlar jartapaqta,-deydi kárxananıń is júrgiziwshisi  Rashid Jumambetov.

Óndiris qızǵınlıq penen alıp barılıp atırǵan bul jerde hesh bir bos júrgen jumısshını ushıratpaysań. Olardıń hár biri jumıs penen bánt bolıp, qapılardıń  tezirek pitip, qarıydardıń qolına sapalı bolıp jetip barıwına háreket etpekte.

-Kárxanamızda on bes adam jumıs penen támiyinlengen. Ónimlerimizdi tiykarınan ishki bazarǵa satıp atırmız. Eń arzan qapılarımız 400 mıń bolsa, qımbatlawı 600 mıń muǵdarında. Ónimlerimizdi bazarǵa shıǵarıw menen birge qarıydarlardıń buyırtpası boyınsha jumıs islep atırmız. Dáramatımız jaman emes. Aylıqlarımızdı da waqtında alıp atırmız,-deydi «Ramazan-Gúlnaz»  JShJ jumısshısı Bekbolat Nurımbetov.

Bul jerde jumıs alıp barıp atırǵan jumısshılardıń hár biri menen sáwbetlesseń olardıń óz kásibine degen súyispenshiliginiń gúwası bolasań. Demek, bul jerdegi isbilermen menen jumısshılardıń bir maqsette jumıs alıp barıwı arqalı jaqsı nátiyjelerge erisiwi xalıqqa xızmet hám shańaraǵına mol dáramat bolıp qaytpaqta.

G.Turdıshova, Qaraqalpaqstan xabar agentligi