Qaraqalpaqstan Respublikası Bajıxana basqarmasınıń Kontrabandaǵa qarsı gúresiw bólimi hám “Qaraqalpaqstan” temir jol shegara bajıxana postı xızmetkerleri tárepinen zergerlik buyımların bajıxana shegaraları arqalı nızamsız túrde jasırın alıp ótiwge urınıw jaǵdayları anıqlandı.

Usı shegara bajıxana postına 652-sanlı “Beynew-Nókis” jónelisindegi jolawshı poezdınıń 9-vagonında Qazaqstan Respublikasınan kirip kelgen Ózbekstan Respublikası puqarasınıń qol sumkası gúwalardıń qatnasıwında tekseriwden ótkerildi.

Nátiyjede, bajıxana xızmetkeriniń awız-eki sorawında aytılmaǵan, jolawshı bajıxana deklaraciyasında jazıp kórsetilmegen, jasırın túrde alıp ótiwge urınǵan 6 túrdegi 17 dana, jámi salmaǵı 79,50 gramm bolǵan bahalı metall-altınnan, reńli metalldan islengen zergerlik buyımların hesh qanday hújjetlersiz Qazaqstannan Ózbekstanǵa alıp kirip atırǵanı anıqlandı.

Esletip ótemiz, temir jol arqalı háreketlengende puqaralar ekvivalenti 500 AQSh dolları bahasındaǵı tovarlardı mámleketimiz aymaǵına bajısız alıp kiriwi múmkin. Bahası onnan artqan tovarlarǵa bajıxana tólemleriniń óndiriliwi názerde tutılǵan.

Joqarıda anıqlanǵan jaǵday boyınsha bajıxana uyımları tárepinen tergewge shekemgi tekseriw háreketleri alıp barılmaqta.

Qaraqalpaqstan xabar agentligi