Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qanlıkól rayonında xalıqtıń abadan turmısın támiyinlew, jańa jumıs orınların jaratıw, qosımsha dáramat alıwına járdem beriw baǵdarında ámelge asırılıp atırǵan jumıslar menen tanıstı.

Dáslep, Toǵay xojalıǵı pitomniginde ámelge asırılıp atırǵan jumıslar kózden ótkerildi.  Bunnan soń Beskópir APJ aymaǵında jaslarǵa ajıratılǵan jer maydanları, sonday-aq, «Agrobank» AJ tárepinen shólkemlestirilgen «Bir kontur – bir ónim» ólshemi tiykarında shólkemlestirilgen jumıslar barıp kórildi.

Joqarǵı Keńes Baslıǵı Arzımbetqum APJdaǵı qıytaq jerinen nátiyjeli paydalanıp atırǵan S.Ótepbergenovtıń hám úy sharayatında xızmet kórsetiwdi jolǵa qoyǵan M.Sarsenbaevanıń shańaraǵında bolıp, azǵana jerdi mol dáramat deregine aylandırıw boyınsha shólkemlestirilgen jumıslar menen tanıstı. Bunday jumıslardı awıl xalqı arasında ele de keńnen en jaydırıw kerek ekenligi atap ótildi.

 

Bunnan soń Joqarǵı Keńes Baslıǵı Mádeniyat MPJdaǵı kóshe biyleri menen ushırastı. Olardıń tilek-ótinishlerin tıńladı. Mashqalalardı belgilep alıp, tez arada sheshimin tabıw boyınsha juwapkerlerge anıq tapsırmalar berildi.

Rayon aymaǵındaǵı «Mebel Gold Jasmina» JShJ tárepinen mebel islep shıǵarıw joybarı hám «ABDIMURATOV TAZABAY» JShJnıń konditer ónimlerin islep shıǵarıw joybarları da kózden ótkerildi. Bunnan tısqarı, «LAN-S» kárxanası jumısları da úyrenildi. Isbilermenlerdi bárqulla qollap-quwatlaw, olardıń óz jumısın ele de rawajlandırıwı ushın barlıq járdemlerdi kórsetiw boyınsha juwapkerlerge tapsırmalar berildi.

 

Joqarǵı Keńes Baslıǵı rayon orayındaǵı aralıqtan xızmet kórsetiwshi BPO orayı menen de jaqınnan tanısıp, sanlastırıw hám málimleme texnologiyalarınıń turmısımızda áhmiyeti artıp baratırǵanlıǵı ayrıqsha tilge alındı.

Bunnan soń Qaraqalpaqstan Respublikası Joqarǵı Keńesiniń Baslıǵı A.Orınbaev Qanlıkól rayonın sociallıq-ekonomikalıq jaqtan rawajlandırıw máselelerine arnalǵan májilis ótkerdi.

Onda rayondı hár tárepleme rawajlandırıw, kámbaǵallıqtı qısqartıw, xalıqtıń bántligin támiyinlew jáne investiciyalıq joybarlardı ámelge asırıw hám basqa da jumıslardıń orınlanıwı qórip shıǵıldı.

Májiliste mámleketlik baǵdarlamalar sheńberinde ámelge asırılıp atırǵan jumıslar, avtomobil jollarınıń boyların tártipke keltiriw hám abadanlastırıw, jasıl energiya qurılmaların ornatıw, máhállelerdi abadanlastırıw, arnawlı qararlar boyınsha belgilengen wazıypalardıń orınlanıwı hám basqa da máseleler sın kózqarasta talqılandı.

Atap aytqanda, ishki jollardı ońlaw, awır máhállelerdi abadanlastırıw, qurılıs tarawı, kámbaǵallıq reestrine kirgizilgen shańaraqlar menen islesiw, qıytaq jerlerden nátiyjeli paydalanıw, jaslar hám jumıssız puqaralar ushın ajıratılǵan jer maydanlarında egis jumısların shólkemlestiriw sıyaqlı bir qatar máselelerde kemshiliklerge jol qoyılmaqta. Májiliste usı sıyaqlı mashqalalar, jol qoyılǵan kemshilikler kórsetip berildi.

Ótkerilgen májilis dawamında ámelge asırılıwı tiyis wazıypalar belgilenip, anıq tapsırmalar berildi hám óz wazıypasın orınlawǵa nemquraydılıq penen qarap atırǵan basshılarǵa intizamiy jaza sharasın qollanıw hám zárúr bolsa, lawazımına ılayıqlıǵı máselesin kórip shıǵıw boyınsha tapsırmalar berildi.

Qaraqalpaqstan xabar agentligi.