Mámleketimiz basshısına súwretlew hám ámeliy kórkem óner tarawın bunnan bılay da rawajlandırıwǵa baylanıslı qarar joybarı haqqında málimleme berildi.
Bul tarawlar xalqımız mádeniyatınıń, jaslar tárbiyasınıń ajıralmas bólegi. Biraq aldın, on jıllar dawamında xudojnikler itibardan shette qalǵan edi. Sonlıqtan Prezidentimiz Respublikalıq Ruwxıylıq hám aǵartıwshılıq keńesiniń keńeytilgen májilisinde bul máselege toqtap, juwapkerlerge kórsetpe bergen edi.
Joybarǵa bola, 2026-2027-jıllarda investiciya baǵdarlaması sheńberinde Kórkem óner akademiyasınıń Oraylıq kórgizbeler zalı hám fondı imaratın rekonstrukciyalaw, Tashkent fotosúwretler úyinde Multimedia orayın shólkemlestiriw rejelestirilgen.
Eń áhmiyetlisi, kórkem ónerdi súyiwshi jaslar ushın imkaniyatlar keńeytiledi. Sonıń ishinde, Kórkem fond aymaǵında zamanagóy galereya jáne 40 dóretiwshilik ustaxanadan ibarat Jas xudojnikler orayı qurıladı, Shıǵıs miniatyura kórkem óneri muzeyinde oqıw-óndirislik ustaxanası shólkemlestiriledi. Benkov atındaǵı súwretlew mektebi ońlanıp, 400 orınlıq qosımsha oqıw imaratı, 200 orınlıq jataqxana qurıladı.
«Ustaz-shákirt» principi tiykarında jas qálemkeshlerdi tárbiyalap kiyatırǵan tájiriybeli xudojnikler qosımsha xoshametlenip barıladı. Hár jılı tańlaw tiykarında eń talantlı dóretiwshiler sırt mámleketlerge tájiriybe almasıwǵa jiberiledi.
Kamoliddin Behzod atındaǵı Milliy súwretlew hám dizayn institutında bilimlendiriwdiń sapasın arttırıw ilajları kóriledi. Bul jerde aldınǵı sırt el oqıw rejeleri hám baǵdarlamaları basqıshpa-basqısh engiziledi. Professor-oqıtıwshılardıń múnásip kórkem shıǵarmaları ilimiy monografiyaǵa teńlestiriledi. Sonday-aq, bul instituttı pitkergen qánigelerge mekteplerde súwretlew kórkem óneri páninen sabaq beriwge ruxsat beriledi.
«Jańa Ózbekstan kórinisleri», «Tariyxıy ulamalar» hám «Zaman qaharmanları» dúrkininen dóretiwshilik shıǵarmalardı mámleketlik buyırtpa tiykarında jaratıw sisteması jolǵa qoyıladı.
Prezidentimiz aymaqlarda da xudojnikler ushın sharayatlardı jaqsılaw, jaslardı súwretlew hám ámeliy kórkem ónerge tartıw zárúr ekenligin atap ótti.
ÓzA