ÓzLiDeP partiyası xalıq deputatları Nókis qalalıq Keńesi deputatı Gawhar Redjepova “Boz awıl” MPJda bolıp, máhálleniń hayal-qızları hám jasları haqkında maǵlıwmatlar alıp, olardıń mashqalaların úyrendi. Sonday-aq, mashqalardı sheshiw, jaslardıń bántligin támiyinlew hám profilaktikalıq dizimde turıwshı jaslar menen islesiw, olardıń bos waqıtlarında til úyreniw hám kompyuter kurslarına kamtıw boyınsha máhalle belsendilerine óz usınısların berdi.

“Deputat hám jaslar” joybarı sheńberinde ÓzLiDeP partiyası Qaraqalpaqstan Respublikalıq Keńesiniń jaslar qanatınıń bizneske qızıǵıwshı jasları hám “Boz awıl” MPJnıń jasları menen birgelikte usı máhalle puqaralar jıyını aymaǵında jaylasqan isbilermenlik orınlarına sayaxat shólkemlestirildi.

Biznes sayaxattıń birinshi mánzili óz jumısın 2020-jılı baslaǵan ónerment Rano Berdibaevanıń tigiw cexı boldı. Rano apa usı aymaqtaǵı 7 hayal-qızdı jumıs penen támiyinlep, mayıplıǵı bar qız kelinsheklerdi de tigiw-pishiwge úyretip, bántligin támiyinlewge járdem berip  kiyatırǵan máhálleniń belsendi hayal-qızlarınıń biri boladı.

Deputat jaslar menen sáwbette isbilermenlik tiykarları, mashaqatları hám sol arqalı keletuǵın  jaqsı dáramatlı nátiyje haqqında aytıp ótti. Áhmiyetlisi bul tigiw cexına úyrenemen dep kelgen jaslarǵa biypul óner úyretip, olarǵa ózine kelgen buyırtpalardan berip, tikken tigislerine hátteki,  qol haqqı da beretuǵının aytıp ótti, ónerment Rano Berdibaeva.

Sonday-aq, máhálleniń jas isbilermeni “Boz awıl máhalle universal servis kompaniyası” JShJ  nıń tiykarın salıwshısı “Boz awıl” máhallesindegi kem táminlengen 10 ǵa shamalas  insanlardıń bántligin támiyinlep, olardıń ónerli bolıp, shańaraǵına dármat alıp kiriwine sebepshi bolıp kiyatırǵan jas isbilermen Rashid Qalbaev jaslarǵa óziniń bizneske kirip keliw tariyxı hám bul tarawdaǵı tájriybeleri haqqında aytıp berdi.

– Men sharwashılıq hám diyqanshılıq penen shuǵıllanatuǵın shańaraqta tárbiyalanǵanman. Biznes penen aylanısqan jakınlarım bolmaǵan. Bos waqtımda taksi aydap Nókis qalasınıń kóp jerlerin aylanıp tanısıp shıqqanman. Ózim jasaytuǵın aymaqtan usı biznesti baslawdı niyet ettim hám 2020-jılı isbilermenlikke qol urdım. Basında, álbette, qıyınshılıqlar boldı, biraq házir hámmesi jaqsı. Xázir 31 jastaman maqsetim ele de óz jumısımdı rawajlandırıw,  jumıs orınların jaratıw. Jaslarǵa aytarım bir isti basladınızba hesh qashan onı yarım jolda taslap ketpeń, – deydi isbilermen Rashid Qalbaev.

– Búgin partiya belsendileriniń basshılıǵında isbilermenlik orınlarına kelip, isbilermenlerdiń jumısları, óndiris  orınları menen tanıstıq. Ásirese olardıń biznesti baslaw tariyxı mende úlken qızıǵıwshılıq payda etti. Bir jumıstı baslamay turıp, ol jumıs haqqında maǵlıwmat toplap, analiz islew kerekligin túsindim. Búgingi sayaxat keleshekte maǵan óz jumısımdı baslawda jaqsı mektep boldı, – deydi  Elmiyra Djanuzakova.

Amangul ESEMURATOVA,

ÓzLiDeP Qaraqalpaqstan Respublikası Keńesi Jámiyetshilik penen baylanıslar,

málimleme siyasatı hám ideologiyalıq isler bólimi baslıǵı,

Qaraqalpaqstan xabar agentligi