Múnásibet

Búgingi kúnde jaslar hár qanday jámiyettiń keleshegin belgilep beretuǵın áhmiyetli sociallıq kúsh sıpatında tán alınbaqta. Mámleketimizde de jaslarǵa qaratılǵan itibar mámleketlik siyasattıń tiykarǵı baǵdarlarınan birine aylandı.

30-iyun – Jaslar kúni múnásibeti menen Prezidentimiz Sh.Mirziyoevtiń jaslar menen ushırasıwı áhmiyetli waqıya sıpatında tariyxqa kirdi. Bul ushırasıwda mámleketimiz jetekshisi jaslar turmısınıń barlıq tarawlarına toqtap ótti – bilimlendiriw, isbilermenlik, kórkem óner, sport, IT hám sociallıq belsendilik sıyaqlı baǵdarlar oraylıq orındı iyeledi.

Prezident óziniń shıǵıp sóylegen sózinde jaslarǵa bılay dedi: “Bizge bilimli, intaker, watanına sadıq, dúnyaǵa kózqarası keń hám zamanagóy jaslar kerek. Jańa Ózbekstandı sizler menen quramız.” Bul sózler Prezidenttiń jaslarǵa bolǵan isenimin bildirip, óz gezeginde, olarǵa úlken juwapkershilik júkleytuǵının ańlatadı.

Elimizde hár qıylı tarawlarda erisilip atırǵan nátiyjeler adamdı quwandıradı. Ápiwayı ǵana mısal, jaqında futbol boyınsha milliy saylandı komandamız tariyxta birinshi márte jáhán chempionatına jollamanı qolǵa kirgizdi. Xalqımızdıń neshe jıllıq ármanların ámelge asırdı. Bul bolsa elimizde sportqa, jaslarǵa bolǵan itibardıń nátiyjesi bolıp esaplanadı. Jaslarımızǵa jaratılǵan bunday imkaniyatlar, erteńgi kúni elimizdiń rawajlanıwı ushın investiciya wazıypasın atqaratuǵını sózsiz. Sonday-aq, mekteplerde oqıwshılar ushın “Sheberlik hám biznes saatı” engizilip, olardıń ideyasın startapqa aylandırıwǵa 100 milliard sum grant qaratıladı.

Endi, ápiwayı mektep oqıwshıları ózleriniń jańa joybarları, innovaciyalıq ideyaların ámelge asırıwı ushın imkaniyat esikleri ashıladı. Jasalma intellektti rawajlandırıw boyınsha bank-qarjı, densawlıqtı saqlaw, awıl xojalıǵı hám energetikanı tiykarǵı baǵdar sıpatında belgilep, 100 joybar ámelge asırıladı. Birlesken Arab Ámirlikleri menen birgelikte “Bir million jasalma intellekt jetekshileri” baǵdarlaması iske qosıladı. Mámleketimizdiń jaslarǵa baylanıslı siyasatın xalıqaralıq jámiyetshilik te keńnen tán almaqta. Ózbekstan Birlesken Milletler Shólkemi “Jaslar – 2030” strategiyasın jedel ámelge asırıp atırǵan 10 mámleket qatarına kirdi. Jaslar rawajlanıw indeksinde mámleketimiz bul baǵdarda eń tez pátler menen rawajlanıp atırǵan mámleket, dep tabıldı. Bildirilip atırǵan isenimlerdiń nátiyjesin ápiwayı sózler menen emes, sanlar menen keltiriw múmkin bolsa, ótken jılı elimiz jasları top-500 joqarı oqıw orınlarına kiriw boyınsha Oraylıq Aziyada birinshi orındı iyeledi, 30 jas dúnyanıń top-10, 500 i top-100, 1500 i top-300 universitetlerinde oqıp atırǵanı da bir mısal. Bul – úlken nátiyje.

Prezident jaslarımızdıń ata-babalarǵa, olardıń dúnyaǵa kórsetken potencialına múnásip jol tutatuǵınına isenedi. Jaslar menen ushırasıwda atap ótilgenindey, “Biz jaslarımız ushın sharayat jarattıq, olar bunnan utımlı paydalanıp, biyik shıńlardı iyelemekte. Birinshi hám ekinshi Renessanstı ullı oyshıllarımız jaratqan bolsa, búgin tariyx gezekti sizlerge berip atır,” dep atap ótti mámleketimiz jetekshisi Shavkat Mirziyoev.

Haqıyqatında da, mámleketimiz basshısınıń bıyılǵı Jaslar kúnindegi shıǵıp sóylegen sózi tek ǵana bayram múnásibeti menen bildirilgen qutlıqlaw emes, al mámlekettiń jaslarına qaratılǵan isenim, juwapkershilik hám imkaniyatlar manifesti sıpatında bahalanadı. Juwmaqlap aytqanda, shıǵıp sóylewdegi anıq usınıs hám rejeler jaslar ushın ámeliy qádemler, jańa imkaniyatlar esigin ashıp beredi.

Gúljan Xalmuratova,

Oliy Majlis Nızamshılıq palatasınıń deputatı,

ÓzLiDeP frakciyasınıń aǵzası.

Qaraqalpaqstan xabar agentligi.