«Ózbekstanda isbilermenlik háreketi artqa qaytpaytuǵın úlken kúshke aylandı. Biz mámleket kóleminde óz aldımızǵa qanday úlken maqset hám wazıypalar qoymayıq, olardı ámelge asırıwda pútkil xalqımız benen birge, bárinen burın sizlerge súyenemiz. Isbilermenlerimiz qansha bay bolsa, xalqımız sonsha abadan jasaydı, mámleketimiz sonsha qúdiretli boladı. Isbilermenniń jetiskenligi – bul pútkil xalqımızdıń jetiskenligi»,-degen edi Prezidentimiz isbilermenler menen ushırasıwda.

Dáwir talabı isbilermenlikti talap etip turǵan bir payıtta  mámleketimizde isbilermenlikti rawajlandırıw hám olardı qollap-quwatlawǵa ayrıqsha itibar qaratılıp, Prezidentimiz tárepinen bir qatar qarar hám pármanlar qabıl etildi. Ásirese, Prezidentimizdiń 2023-jıl 8-avgustta «Qaraqalpaqstan Respublikasında isbilermenler ushın qolaylı sharayatlar jaratıwǵa baylanıslı qosımsha ilajlar haqqında» ǵı pármanınıń qabıl etiliwi respublikamızda isbilermenler ushın   úlken imkaniyatlar esigi boldı. Usı párman tiykarında orınlarda jumıs alıp barıp atırǵan isbilermenler óz jumısın jolǵa qoyıwı menen birge mol dáramat tawıp,  xalıqqa xızmet etpekte.

Taqıyatas rayonındaǵı «Jayxun sawda orayı»  JShJ Prezidentimizdiń respublikamızda jumıs alıp barıp atırǵan isbilermenler ushın qabıl etken huqıqıy hújjetleri tiykarında bankten jeńilletilgen kredit alıp, 540 orınlıq «Amore Avenue» toyxanasın  qurıp pitkeredi. Toyxanaǵa Qıtay mámleketinen alıp kelingen buyımlar arqalı dekoraciya  shıraylı etip bezetilip, házirgi waqıtta xalıqqa sapalı  toy xızmetleri kórsetilmekte. Bul jerde jigirmadan aslam adam jumıs penen bánt etilgen.

-Bul sawda komplekste toyxanadan tısqarı mebel hám turmıslıq texnikalıq buyımlar sawda ornı, shashtárezxana, marinad shashlık islep beriw xızmeti islep turıptı. Bul sawda kompleksti iske túsriw arqalı xalıqqa sapalı xızmet kórsetiw menen birge jumıssız jaslardıń bántligin támiyinlewge erisip atırmız,-deydi sawda komplekstiń is júrgiziwshisi, isbilermen Ǵafur Yakubov.

G.Turdıshova,

Qaraqalpaqstan xabar agentligi