Transport ministri Ilhom Mahkamov basshılıǵındaǵı Ózbekstan delegaciyası Qırǵız Respublikasınıń Jalalabad wálayatına bardı. Delegaciya aǵzaları “Qıtay-Qırǵızstan-Ózbekstan” temir jolınıń qurılıs joybarı sheńberinde Ferǵana hám Qos-Dobo tunnellerin qurıw jumısları menen jaqınnan tanıstı.

Bul tunneller “Qıtay – Qırǵızstan – Ózbekstan” temir jolı qurılısınıń tiykarǵı imaratları bolıp esaplanadı. Hárbir tonneldiń uzınlıǵı 12 km den asadı.

Sonday-aq, jumısshı topar “Makmal” temir jol stanciyasınıń ornında qurılısı rejelestirilgen jańa stanciyanıń joybarı hám qurılıs maydanı jáne “Jańa Jalalabad” temir jol stanciyasınıń qurılıs joybarı menen jaqınnan tanıstı.

Maǵlıwmat ornında aytıw kerek, usı jılı 30-iyun kúni Qırǵızstanda “Qıtay – Qırǵızstan – Ózbekstan” xalıqaralıq temir jolınıń pútkil uzınlıǵı boylap tolıq kólemdegi qurılıs jumısları rásmiy túrde baslandı. Bul joybar eń quramalı injenerlik obektlerinen biri bolıp esaplanıp, temir jollardıń 40 procentke shamalası tunnel hám kópirler arqalı ótedi.

Sonday-aq, ministr I.Mahkamov, Qırǵızstan Transport hám kommunikaciyalar ministriniń orınbasarı A.Turǵunbaev, “Qırǵız temir jolı” Milliy kompaniyası Bas direktorınıń orınbasarı N.Arapbaev, “Qıtay-Qırǵızstan-Ózbekstan” temir jol kompaniyasınıń bas direktorı CHjou Sin hám ERS jumıstı bólip alıp islewshi shólkeminiń bas direktorı CHjan Ey Tao qatnasıwında qurılıs procesiniń barısı dodalandı. Tiyisli máseleler boyınsha pikir alısıldı.

Sh.Mamaturopova, ÓzAnıń xabarshısı