Qaraqalpaqstan Respublikası Densawlıqtı saqlaw ministrligi tárepinen Respublikalıq qıstawlı medicinalıq járdem ilimiy orayı Qaraqalpaqstan filialına ǵalaba xabar qurallarınıń wákilleri ushın press-tur shólkemlestirildi.

Filial 300 orınnan ibarat bolıp, xalıqqa kúni-túni qıstawlı medicinalıq járdem kórsetedi. Onda 150 ge shamalas tájiriybeli shıpakerler, 400 ge shamalas orta medicina xızmetkerleri nawqaslarǵa xızmet kórsetip kelmekte. Medicina xızmetkerleriniń mamanlıǵın arttırıw hám shıpakerlerdi zárúr tar taraw qánigeligine qayta tayarlawǵa ayrıqsha itibar qaratılǵan bolıp, onda xirurg, neyroxirurg, travmatolog, terapevt qánigelikleri boyınsha klinikalıq ordinatura oqıw baǵdarlaması ashılǵan.

Filial 2025-jıldan baslap Mámleketlik medicinalıq qamsızlandırıw mexanizmi boyınsha qarjılandırıwǵa ótken.

2024-jıldıń fevral ayında Ózbekstan Respublikası Prezidentiniń 2020-jıl 11-noyabrdegi “2020-2023-jıllarda Qaraqalpaqstan Respublikasın kompleksli sociallıq-ekonomikalıq rawajlandırıw ilajları haqqında” ǵı qararına tiykarlanıp 4 qabatlı jańa imarat qurıp pitkerilip paydalanıwǵa tapsırıldı. Jańa imarat jámi 130 orınǵa mólsherlengen bolıp, onda ayrıqsha qabıllaw (triaj sistemasında), 60 orınlıq xirurgiya, 25 orınlıq neyroxirurgiya, 25 orınlıq travmatologiya, 20 orınlıq ginekologiya, sonday-aq, 7 zamanagóy operaciya bólmeleri, klinikalıq-bioximiyalıq laboratoriya, oraylıq sterilizaciya punkti hám qan banki bólimleri xalıqqa kúni-túni qıstawlı medicinalıq járdem kórsetedi.

Sońǵı jıllarda filialdıń materiallıq-texnikalıq bazası jeterli dárejede bekkemlengen. Filial jańa angiografiya, AIK, MSKT, Xolter, sanlı rentgen, FGDS, laparaskop, UTT, gemodializ hám basqa da zamanagóy medicinalıq ásbap-úskeneler menen támiyinlendi, nawqaslarǵa sapalı qıstawlı medicinalıq járdem hám kem invazivli, joqarı texnologiyalı xirurgiyalıq ámeliyatlardı ótkeriw ushın jeterli sharayatlar jaratıldı. Filialdı awır jaǵdaydaǵı nawqaslarǵa úzliksiz kislorod penen támiyinlew maqsetinde Kislorod stanciyaları menen de támiyinlendi.

Angiografiya úskenesinde zamanagóy diagnostika ámeliyatı – koronografiya hám júrek ishemik keselliklerinde stentlew ámeliyatı jolǵa qoyıldı.

Filialda 2024-jıldan baslap ashıq usılda kardioxirurgiyalıq operaciyalar islep atırǵan júrekte aorto-koronar shuntlaw operaciyası orınlanıp kelinbekte.

Urologiyalıq nawqaslarǵa zamanagóy endourologiyalıq xirurgiyalıq operaciyalar (tranuretral intrioptikalıq ureterolitotripsiya, perkutant nefrostomiya, perkutant nefrolitotripciya, mochechnikti stentlew) jolǵa qoyıldı.

Nawqaslarǵa filialda kem invazivli laparaskopikalıq xirurgiyalıq operaciyalar ótkeriw keyingi jılları kóbeygen. (2023-jılı -954, 2024-jılı 1350).

Filial oraylasqan halda zamanagóy telemedicina úskeneleri menen támiyinlengen. Filialda awır hám emlew-diagnostika processlerinde quramalı emlewlerdi talap etetuǵın nawqaslarǵa Tashkent qalası Respublikalıq qıstawlı medicinalıq járdem ilimiy orayınıń maman qánigeleri menen, Qaraqalpaqstan Respublikası rayonlıq medicina birlespelerindegi awır nawqaslarǵa filial maman qánigeleri menen telemedicina baǵdarlamasında real waqıt rejiminde onlayn-másláhátlesiw ámeliyatı engizilgen.

Press-tur dawamında qatnasıwshılar filialda jaratılǵan sharayatlar menen tanısıp, qızıqtırǵan sorawlarına juwap aldı.

Á.Jiyemuratov,

Qaraqalpaqstan xabar agentligi.