Taxtakópir rayonınıń eń bir payızlı «Qaratereń» ekoturizm kompleksinde «Áhmiyetli 90 kúnlik» joybarı sheńberinde balalardıń jazǵı dem alıs kúnlerin mazmunlı ótkeriw hám olardıń sportqa bolǵan qızıǵıwshılıǵın arttırıw maqsetinde, 2006-2007-jıllarda tuwılǵan jaslar arasında sporttıń milliy gúres túri boyınsha «Taxtakópir rayonı hákiminiń kubogi» jarısı ótkerildi.

Haqıyqıy sport bayramı sıpatında ótkerilgen jarısqa respublikamızdıń barlıq qala hám rayonlarınan 14 komanda qatnasıp, olar hár qıylı salmaq kategoriyaları boyınsha óz-ara bellesti.

Keskin bellesiwlerge bay bolǵan jarıs sońında, ulıwma komandalıq esapta Taxtakópir rayonınıń jas palwanları bas sıylıqtı jeńip alıwǵa miyasar boldı.

Maydan iyelerine jeńilip qalǵan shımbaylı palwanlar sıylı ekinshi orındı iyelegen bolsa, Nókis qalası hám Nókis rayonı komandası úshinshi orındı jeńip alıwǵa eristi.

-Jarısta palwanlar 7 salmaq kategoriyası boyınsha bellesti,-deydi shımbaylı palwanlardıń ustazı Salamat Daniyarov.-Dáslep Qońırat rayonı, sońınan Nókis qalası komandasın jeńgen bolsaq, finalda Taxtakópir rayonı palwanlarına 4:3 esabında jeńilip qaldıq. Sportta kúsh penen birgelikte, áwmet te ayrıqsha xızmet atqaradı. Bul ret taxtakópirli palwanlarǵa áwmet kúlip baqtı. Aldaǵı jarıslarda jeńimpazlıqtı qoldan bermewge háreket etemiz.

Jarıs sońında jeńimpaz komandalar shólkemlestiriwshiler tárepinen tayarlanǵan arnawlı kubok, diplom hám estelik sawǵalar  menen sıylıqlandı.

Adilbay Orazov,

Qaraqalpaqstan xabar agentligi sholıwshısı.