Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komiteti tárepinen Kásiplik awqamları háreketiniń 120 jıllıǵı hám 30-iyun – «Jaslar kúni» múnásibeti menen «Basshı hám Jaslar» atamasında mádeniy ilaj ótkerildi.

Onda Jaslar isleri agentliginiń qala hám rayonlardaǵı belsendileri qatnastı.
Ilajda Ózbekstan Mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komitetiniń baslıǵı J.Ayapov, Ózbekstan kásiplik awqamları Federaciyası Qaraqalpaqstan Keńesi baslıǵınıń jaslar máselesi boyınsha másláhátshisi N.Aliev hám Jaslar isleri agentliginiń Qaraqalpaqstan Respublikası basqarması baslıǵınıń orınbasarı M.Tursınovlar shıǵıp sóylep, «Jaslar kúni» múnásibeti menen jaslardı qızǵın qutlıqladı.

Jaslarǵa birlesken komiteti sistemasındaǵı baslanǵısh kásiplik awqamı shólkemleri hám mákemelerinde jaslar boyınsha alıp barılǵan jumıslar haqqında keń túrde maǵlıwmatlar berilip, pidayı jaslardıń óndiristegi, kishi biznestegi, diyqnshılıq tarawındaǵı hám basqa da jámiyetlik jumıslardaǵı miynetleri ayrıqsha atap ótildi.

Ilaj dawamında Jaslar isleri agentliginiń qala hám rayonlardaǵı belsendilerinen 52 jas hám basqarmadaǵı jas qánigeler Ózbekstan Mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komitetiniń «Húrmet jarlıǵı» menen sıylıqlandı hám «Minnetdarshılıq xatı» menen estelik sawǵalar tapsırıldı.

Qaraqalpaqstan xabar agentligi.