Bizge belgili, mámleketimizde geomálimleme infrastrukturasın jetilistiriw, zamanagóy texnologiyalardı engiziw hám sanlı xızmetlerdiń sapasın jáne qamtıp alıwın keńeytiw baǵdarında izbe-iz jumıslar alıp barılmaqta.

Sonıń ishinde, «Milliy geografiyalıq málimleme sistemasın jaratıw» investiciyalıq joybarı sheńberinde 2018-jılı jumıslar baslanǵan bolıp, dáslepki basqıshta 50 globallıq navigaciyalıq jasalma joldas sisteması (GNJJ) stanciyası iske qosıldı.
Bul stanciyalar dúnyanıń jetekshi islep shıǵarıwshılarınan biri – Leica Geosystems kompaniyasınıń GR50 markalı joqarı anıqlıqtaǵı qabıllawshı qurılmaları menen úskenelengen. Sistemada Spider programmalıq támiynatı ornatılǵan bolıp, ol 60 qa shekem stanciyanı oraylasqan halda basqarıw hám 500 ge shekem paydalanıwshını úzliksiz túrde jalǵaw imkaniyatın beredi.
Házirgi kúnde bul baǵdarlama arqalı Kadastr agentliginiń 50 hám Ayrıqsha jaǵdaylar ministrliginiń 10 GNJJ stanciyası nátiyjeli basqarılmaqta. Sistema arqalı real waqıt rejiminde 500 ge shekem abonentke joqarı anıqlıqtaǵı geomaǵlıwmatlar tiykarında xızmetler kórsetilmekte.
Joybardıń keyingi basqıshında, yaǵnıy 2025-2026-jıllar dawamında jáne 80 GNJJ stanciyasın satıp alıw hám olardıń ulıwma sanın 130 ǵa jetkeriw rejelestirilgen.
Bul process sheńberinde Kadastr agentligi qarjıları esabınan 80 jańa geodeziya punkti qurıldı hám zamanagóy talaplar tiykarında úskenelerdi saqlaw xanaları tayarlandı. Sonday-aq, olardı Ózbekstan Respublikası mámleketlik geodeziya tarmaǵına integraciyalaw maqsetinde zárúr ólshew hám baylanıstırıw jumısları da tolıq ámelge asırıldı.
Bunday keń kólemli hám sistemalı ilajlar tek ǵana jer resurslarınan aqılǵa uǵras paydalanıw emes, al sanlı ekonomika, urbanizaciya hám infrastruktura joybarların ilimiy tiykarda basqarıw imkaniyatın beriwge xızmet etiwi menen de áhmiyetli.

Sh.Mamaturopova, ÓzA