Sońǵı jılları elimizde Prezidentimizdiń basshılıǵında jaslardı hár tárepleme qollap-quwatlaw, olardıń zaman talabına say tálim-tárbiya alıwı, kásip-óner iyelewi ushın qolaylı sharayatlar jaratıwǵa ayrıqsha itibar qaratılıp, bul baǵdarda kóplegen iygilikli isler ámelge asırılmaqta.

Ásirese, Ózbekstan Respublikası Ministrler Kabinetiniń “Jetim hám ata-ana qaramaǵınan ayırılǵan balalardı turaq jay menen támiyinlew tartibi haqqında”ǵı qararı tiykarında elimizdegi kóplegen jaslar turaq jay menen támiyinlenip, olar quwanıshqa bólenbekte.
Atap aytqanda, 30-iyun- Jaslar kúni sánesi múnásibeti Kegeyli rayonında ata-ana qaramaǵınan ayırılǵan usınday eki jasqa «Jańa Ózbekstan» turaq jaylar massivinen zamanagóy hám barlıq qolaylıqlarǵa iye bolǵan 2 xanalı turaq jaydıń giltleri saltanatlı túrde tapsırıldı.
Ilajǵa rayon hákimi Aybek Kamalov hám aymaq belsendileri qatnasıp, jańa turaq jay iyelerine qutlı bolsın ayttı hám Prezidentimizdiń basshılıǵında alıp barılıp atırǵan bunday iygilikli isler rayonda ele de dawam etetuǵınlıǵın atap ótti.
-Mine búgin bizler Prezidentimizdiń bizlerdey jaslarǵa kórsetip atırǵan atalarsha ǵamqorlıǵınıń arqasında, usınday turaq jayǵa iye bolıp atırmız,-deydi jańa turaq iyesi Sárdar Ernazarov.-Bizlerge kórsetilip atırǵan ǵamqorlıq ushın elimiz basshılarına úlken raxmet aytamız hám bildirilgen isenimdi tolıq aqlaw ushın ayanbastan xızmet ete beremiz.
Respublikamız aymaqlarında sociallıq qorǵawǵa mútáj jaslarǵa kórsetip atırǵan bunday qollap-quwatlaw, Jurtabasshımızdıń jaslarǵa kórsetilip atırǵan ayrıqsha itibarı hám ǵamqorlıǵınıń jáne bir ámeliy kórinisi boldı, desek aljaspaǵan bolamız.

Qaraqalpaqstan xabar agentligi