Sońǵı jılları mámleketimizde barlıq tarawlar sıyaqlı, jol qurılısında mámleketimiz basshısı tárepinen qabıl etilgen qarar hám pármanlar tiykarında jollardı basqıshpa-basqısh rekonstrukciyalaw jumısları alıp barılmaqta. Bunday dóretiwshilik jumıslardıń nátiyjesinde qala hám awıllarımızdaǵı jollar keń hám tegis bolmaqta.

Ásirese, respublikamız aymaǵınan ótiwshi xalıqaralıq áhmiyetke iye A-380 «Ǵuzar-Buxara-Nókis-Beynew» avtomobil jolınıń ótkeriwsheńligin arttırıw maqsetinde islenip atırǵan jumıslar elimizdiń sociallıq-ekonomikalıq rawajlanıwında áhmiyetli orın tutpaqta.
Qaraqalpaqstan Respublikası Ministrler Keńesiniń Baslıǵı Farhod Ermanov hám Ózbekstan Respublikası Transport ministrligi janındaǵı Avtomobil jolları komitetiniń baslıǵı Jamshid Tursunov penen birgelikte respublikamızdıń Qaraózek hám Beruniy rayonları aymaǵınan ótiwshi A-380 «Ǵuzar-Buxara-Nókis-Beynew» avtomobil jolınıń 673-698 km (25 km) inde alıp barılıp atırǵan jumıslar menen jaqınnan tanısıp, jol qurıwshılarǵa harmasın ayttı.
Bul jol xalıqaralıq tranzit imkaniyatların keńeytiw, transport aǵımın jaqsılaw, transport basqarıwshıları hám jolawshılar ushın qolaylı sharayatlar jaratıwǵa qaratılǵan.
Ulıwma bahası 48,7 million dollar bolǵan joybar qurılısınıń jumısların sapalı alıp barıwda xalıqaralıq konsalting kompaniyaları tartılǵan bolıp, házirgi waqıtta arnawlı mashina mexanizmleri hám jumısshı-qánigeler mobilizaciyalanǵan hám qurılıstı tez kúnlerde sapalı etip juwmaqlaw ushın qızǵın jumıslar alıp barılmaqta.

Qaraqalpaqstan xabar agentligi